41
ਦੱਸਾਂ ਕੀ ਮੈਂ ਹਾਲ ਸਿਆਸਤਦਾਨਾਂ ਦਾ।
ਕਿਬਲਾ ਕਾਹਬਾ ਮਾਲ ਸਿਆਸਤਦਾਨਾਂ ਦਾ।
ਜਲਸੇ, ਵਿੱਚ ਜਲੂਸਾਂ ਕਦੇ ਵੀ ਹੋਇਆ ਨਈਂ,
ਮਰਿਆ ਹੋਵੇ ਬਾਲ ਸਿਆਸਤਦਾਨਾਂ ਦਾ।
ਨੱਚੋ ਲੋਕੋ ਖੈਰ ਮਨਾਈਏ ਧਰਤੀ ਦੀ,
ਆਇਆ ਫੇਰ ਭੂਚਾਲ ਸਿਆਸਤਦਾਨਾਂ ਦਾ।
ਸਾਡੇ ਮੂੰਹ ਤੇ ਆਖਣ ਸਾਨੂੰ ਆਣ ਗ਼ਰੀਬ,
ਵੇਖੋ ਯਾਰ ਕਮਾਲ ਸਿਆਸਤਦਾਨਾਂ ਦਾ।
ਅੱਪੜ ਜਾਵਣ ਜਿਸ ਦਿਨ ਵਿੱਚ ਅਸੈਂਬਲੀ ਦੇ,
ਤੱਕਣਾ ਫੇਰ ਜਲਾਲ ਸਿਆਸਤਦਾਨਾਂ ਦਾ।
ਅਸੀਂ ਆਂ ਭੋਲੇ ਪੰਛੀ ਫਸਣਾ ਫੇਰ ਅਸਾਂ,
ਲੱਗਾ ਫੇਰ ਏ ਜਾਲ ਸਿਆਸਤਦਾਨਾਂ ਦਾ।
ਹੁਣ ਤੇ ਪਾ ਲਓ ਜੱਫੀਆਂ, ਕੱਲ੍ਹ ਪ੍ਰਛਾਵਾਂ ਵੀ,
ਖਹਿ ਨਈਂ ਸਕਦਾ ਨਾਲ ਸਿਆਸਤਦਾਨਾਂ ਦਾ।
ਸਾਡੀ ਫੇਰ ਚੰਗੇਰ ਨੇ ਖਾਲੀ ਰਹਿਣਾ ਏਂ,
ਭਰ ਜਾਣਾ ਏਂ ਖਾਲ ਸਿਆਸਤਦਾਨਾਂ ਦਾ।
ਜਿੰਨਾ ਤੀਕ ਅਲੈਕਸ਼ਨ 'ਬਾਬਾ' ਹੁੰਦਾ ਨਈਂ,
ਰਿਸ਼ਤਾ ਸਾਡੇ ਨਾਲ ਸਿਆਸਤਦਾਨਾਂ ਦਾ।
-0-
