46
(ਹਬੀਬ ਜਾਲਬ ਦੇ ਨਾਂ)
ਕੌਣ ਕਰੇਗਾ ਖਰੀਆਂ ਗੱਲਾਂ ਤੇਰੇ ਬਾਅਦ।
ਸੁੱਕ ਨਾ ਜਾਵਣ ਹਰੀਆਂ ਵੱਲਾਂ ਤੇਰੇ ਬਾਅਦ।
ਦੁੱਖ ਰਵ੍ਹੇਗਾ ਪੁੱਛ ਨਈਂ ਸਕਿਆ ਜ਼ਾਲਮ ਨਾਲ,
ਗੱਲ ਕਰਨ ਲਈ ਕਿਹਨੂੰ ਘੱਲਾਂ ਤੇਰੇ ਬਾਅਦ।
ਰਾਹਵਾਂ ਭੁੱਲੀਆਂ, ਨਹਿਰਾਂ ਤੇ ਦਰਿਆਵਾਂ ਨੂੰ,
ਤੜਫਦੀਆਂ ਵਿੱਚ ਸਮੁੰਦਰ ਛੱਲਾਂ ਤੇਰੇ ਬਾਅਦ।
ਝੁੱਗੀਆਂ ਵਿੱਚ ਨੇ ਹਉਕੇ, ਹੰਝੂ, ਹਾਵਾਂ ਬੱਸ,
ਹਾਸੇ ਭੰਗੜੇ ਵਿੱਚ ਮਹੱਲਾਂ ਤੇਰੇ ਬਾਅਦ।
ਬਾਲਾਂਗਾ ਮੈਂ ਦੀਵੇ 'ਜਾਲਬ' ਤੇਰੀ ਸਹੁੰ,
ਵਿੱਚ ਹਨੇਰੇ, ਵਿੱਚ ਪੰਡਾਲਾਂ, ਤੇਰੇ ਬਾਅਦ।
ਤੇਰੇ ਵਰਗਾ ਇੱਕ ਵੀ ਸ਼ਹਿਰੀ ਦਿੱਸਦਾ ਨਈਂ,
'ਜਾਲਬ' ਜਿਸ ਦੇ ਨਾਲ ਮੈਂ ਚੱਲਾਂ ਤੇਰੇ ਬਾਅਦ।
-0-
