10. ਅਜੇ ਵੀ
ਅਜੇ ਵੀ ਕੁਝ ਨਈਂ ਹੋਇਆ, ਵੀਰੋ ਸੋਚ ਲਵੋ।
ਖੂਹ ਨਈਂ ਬਣਿਆ ਟੋਆ, ਵੀਰੋ ਸੋਚ ਲਵੋ।
ਰੁੱਸੇ ਹਾਸੇ ਮੁੜ ਸਕਦੇ ਨੇ।
ਟੁੱਟੇ ਸ਼ੀਸ਼ੇ ਜੁੜ ਸਕਦੇ ਨੇ।
ਜ਼ਹਿਰ ਪਿਆਲੇ ਰੁੜ੍ਹ ਸਕਦੇ ਨੇ।
ਹਾਲੀ ਸੱਚ ਨਈਂ ਮੋਇਆ, ਵੀਰੋ ਸੋਚ ਲਵੋ।
ਅਜੇ ਵੀ ਕੁਝ ਨਈਂ ਹੋਇਆ, ਵੀਰੋ ਸੋਚ ਲਵੋ।
ਕਿਹੜੀ ਗੱਲੋਂ ਲੜਦੇ ਪਏ ਜੇ।
ਡਾਗਾਂ ਸੋਟੇ ਫੜਦੇ ਪਏ ਜੇ।
ਇੱਕ ਦੂਜੇ ਤੋਂ ਸੜਦੇ ਪਏ ਜੇ।
ਅੱਖੋਂ ਲਹੂ ਨਈਂ ਚੋਇਆ, ਵੀਰੋ ਸੋਚ ਲਵੋ।
ਅਜੇ ਵੀ ਕੁਝ ਨਈਂ ਹੋਇਆ, ਵੀਰੋ ਸੋਚ ਲਵੋ।
ਕੱਚੀਆਂ ਅੰਬੀਆਂ ਟੁੱਕਦੇ ਪਏ ਜੇ।
ਕਿਸ ਦੀ ਖਾਤਰ ਮੁਕਦੇ ਪਏ ਨੇ।
ਸ਼ੀਸ਼ੇ ਉੱਤੇ ਥੁੱਕਦੇ ਪਏ ਜੇ।
ਹਾਲੀ ਫੁੱਲ ਨਰੋਇਆ, ਵੀਰੋ ਸੋਚ ਲਵੋ।
ਅਜੇ ਵੀ ਕੁਝ ਨਈਂ ਹੋਇਆ, ਵੀਰੋ ਸੋਚ ਲਵੋ।
ਅਜੇ ਵੀ ਰਲ ਕੇ ਬਹਿ ਸਕਦੇ ਆਂ।
ਸਦੀਆਂ ਕੱਠੇ ਰਹਿ ਸਕਦੇ ਆਂ।
ਆਪਣੇ ਦਿਲ ਦੀ ਕਹਿ ਸਕਦੇ ਆਂ।
ਹਾਲੀ ਜੱਗ ਨਈਂ ਰੋਇਆ, ਵੀਰੋ ਸੋਚ ਲਵੋ।
ਅਜੇ ਵੀ ਕੁਝ ਨਈਂ ਹੋਇਆ, ਵੀਰੋ ਸੋਚ ਲਵੋ।
-0-
