9
ਝੱਖੜਾਂ ਅੱਗੇ ਤਾਹੀਓਂ ਅੜਿਆ ਹੋਇਆ ਵਾਂ।
ਲੋਕਾਂ ਨਾਲੋਂ ਵੱਖ ਨਾ ਖੜਿਆ ਹੋਇਆਂ ਵਾਂ।
ਅੱਜ ਵੀ ਜਿਹੜੇ ਕਹਿਣ ਕਸੀਦੇ ਹਾਕਮ ਦੇ,
ਉਹਨਾਂ ਸ਼ਾਇਰਾਂ ਕੋਲੋਂ ਸੜਿਆ ਹੋਇਆਂ ਵਾਂ।
ਉਹਨੂੰ ਜ਼ੰਗ ਨਈਂ ਲੱਗਣਾ ਐਵੇਂ ਸੋਚੋ ਨਾ,
ਜਿਹੜੀ ਵਿੱਚ ਅੰਗੂਠੀ ਜੜਿਆ ਹੋਇਆ ਵਾਂ।
ਜਿਹੜੇ ਨਾਲ ਟੁਰੇ ਸਨ, ਕਿਧਰ ਟੁਰ ਗਏ ਨੇ,
ਵਖਤਾਂ ਨੂੰ ਮੈਂ 'ਕੱਲ੍ਹਾ ਫੜਿਆ ਹੋਇਆ ਵਾਂ।
ਇਕ ਦੂਜੇ ਦੀਆਂ ਲਾਸ਼ਾਂ ਉੱਤੇ ਭੁੜਕਣ ਲੋਕ,
ਰੱਬਾ! ਕਿਹੜੀ ਨਗਰੀ ਵੜਿਆ ਹੋਇਆਂ ਵਾਂ।
ਕਿਸਰਾਂ ਡੁੱਲ੍ਹਿਆ ਹੁੰਦਾ ਬਾਹਰ ਕੜਾਹੀਓਂ ਮੈਂ,
ਮੱਠੀ ਮੱਠੀ ਅੱਗ ਤੇ ਕੜ੍ਹਿਆ ਹੋਇਆ ਵਾਂ।
ਨਿੰਦਿਆ ਕਿੰਝ ਕਰਾਂ ਨਾ ਕਾਣੀਆਂ ਵੰਡਾਂ ਦੀ,
ਬੁੱਲ੍ਹੇ ਦੇ ਮਦਰੱਸੇ ਪੜ੍ਹਿਆ ਹੋਇਆ ਵਾਂ।
ਤੱਕੜੀ ਫੜ ਕੇ ਜੋ ਵੀ ਡੰਡੀ ਮਾਰੇਗਾ,
ਸਮਝੋ ਉਹਦੇ ਨਾਲ ਮੈਂ ਲੜਿਆ ਹੋਇਆ ਵਾਂ।
-0-
