11
ਲੋਕੋ ਸੱਚ ਲੁਕਾ ਨਈਂ ਸਕਦਾ।
ਆਪਣਾ ਰੱਬ ਭੁਲਾ ਨਈਂ ਸਕਦਾ।
ਮੇਰੇ ਨਾਲ ਟੁਰੇ ਨਾ ਜਿਹੜਾ,
ਸਿਰ ਦੀ ਬਾਜ਼ੀ ਲਾ ਨਈਂ ਸਕਦਾ।
ਤੂੰ ਵੀ ਸਾਡੇ ਸਿਰ ਤੋਂ ਰੱਬਾ,
ਕਾਲੀ ਰਾਤ ਮੁਕਾ ਨਈਂ ਸਕਦਾ।
ਮਰ ਸਕਨਾ ਵਾਂ ਜ਼ੁਲਮਾਂ ਅੱਗੇ,
ਆਪਣੀ ਧੌਣ ਝੁਕਾ ਨਈਂ ਸਕਦਾ।
ਸਿਰ ਤੇ ਤੇਰਾ ਕੱਜ ਦਿਆਂਗਾ,
ਜ਼ੁਲਫਾਂ ਮੈਂ ਸੁਲਝਾ ਨਈਂ ਸਕਦਾ।
ਹਿੰਮਤਾਂ ਬਾਝੋਂ ਕੋਈ ਵੀ ਬੰਦਾ,
ਆਪਣੀ ਮੰਜ਼ਿਲ ਪਾ ਨਈਂ ਸਕਦਾ।
ਮੈਂ ਤੇ ਰੱਬ ਭੁਲਾ ਸਕਦਾ ਵਾਂ,
ਮੈਨੂੰ ਰੱਬ ਭੁਲਾ ਨਈਂ ਸਕਦਾ।
ਤੇਰੇ ਬਾਲੇ ਦੀਵੇ 'ਬਾਬਾ',
ਕੋਈ ਤੂਫਾਨ ਬੁਝਾ ਨਈਂ ਸਕਦਾ।
-0-
