13
ਅੱਖਾਂ ਅੱਗੋਂ ਕਿਸਰਾਂ ਹੋਵੇ ਰੱਬਾ ਮੰਦਰ ਗੁੰਮ।
ਇੱਕੋ ਥਾਂ ਤੇ ਉਹਦਾ ਹੋਇਆ, ਸਾਰਾ ਟੱਬਰ ਗੁੰਮ।
ਜੋ ਵੀ ਖੋਹਣਾ ਮੇਰੇ ਕੋਲੋਂ, ਇੱਕੋ ਵਾਰੀ ਖੋਹ,
ਰੋਜ਼ ਕਰੀਂ ਨਾ ਮੇਰੇ ਸੀਨੇ ਆਪਣਾ ਖੰਜਰ ਗੁੰਮ।
ਅੱਜ ਵੀ ਸੂਰਜ ਸਿਰ ਤੋਂ ਲਾਹ ਕੇ ਮੁੜਿਆ ਖਾਲੀ ਹੱਥ,
ਅੱਜ ਵੀ ਦੂਜੀਆਂ ਸੱਧਰਾਂ ਵਾਂਗੂੰ ਦਿਲ ਦੀ ਸੱਧਰ ਗੁੰਮ।
ਲੋਕਾਂ ਦੇ ਸਿਰ ਮੜ੍ਹਦਾ ਫਿਰਦਾਂ ਚਾਤਰ ਵੱਲੇ ਵੇਖ,
ਆਪਣੇ ਹੱਥੀਂ ਘਰ ਦਾ ਵੇਖੋ ਕਰ ਕੇ ਟਾਵਰ ਗੁੰਮ।
ਮੈਂ ਵੀ ਉੱਤੋਂ ਲਾਹ ਕੇ ਫੂਕੀ ਬੁਜ਼ਦਿਲ ਵਾਲੀ ਕੁੰਜ,
ਤੇਰੇ ਸੰਘ 'ਚ ਹੋ ਜਾਵੇਗੀ ਤੇਰੀ ਚਾਂਗਰ ਗੁੰਮ।
ਆਪਣੇ ਵਿਹੜੇ ਸੱਜਰ ਸੂਈਆਂ ਕਰਨ ਲਈ ਗੱਭਰੂ ਪੁੱਤ,
ਸਾਡੀ ਵਾਰੀ ਦੁੱਧਾਂ ਵਾਲੇ ਸੱਭੇ ਡੰਗਰ ਗੁੰਮ।
ਕੋਈ ਤੇ ਕਲਗੀ ਵਾਲਾ ਉਹਨੂੰ ਇਹ ਤੇ ਲੈਂਦਾ ਪੁੱਛ,
ਤੂੰ ਕਿਉਂ ਸਾਡੇ ਵਿੱਚ ਸਮੁੰਦਰ ਕੀਤੇ ਲੰਗਰ ਗੁੰਮ।
