19
ਜੱਗ ਤੇ ਕੌਣ ਸ਼ਰਾਰਤ ਕਰਦਾ ਫਿਰਦਾ ਏ।
ਵਿੱਚ ਦਿਲਾਂ ਦੇ ਨਫਰਤ ਭਰਦਾ ਫਿਰਦਾ ਏ।
ਕਬਰੇ ਲੈ ਨਾ ਜਾਵਾਂ ਦਿਲ ਦੀ ਪੀੜ ਕਿਤੇ,
ਬੰਦਾ ਬੰਦੇ ਕੋਲੋਂ ਡਰਦਾ ਫਿਰਦਾ ਏ।
ਇੱਕੇ ਗੁੰਝਲ ਨਈਓਂ ਖੁੱਲ੍ਹੀ ਸਦੀਆਂ ਤੋਂ,
ਜਿੱਤਣ ਵਾਲਾ ਕਿਹੜਾ ਹਰਦਾ ਫਿਰਦਾ ਏ।
ਕੋਈ ਵੀ ਸੱਚੀ ਗੱਲ ਨਈਂ ਕਰਦਾ ਉੱਗੜ ਕੇ,
ਚੁੱਪ ਦਾ ਕੌਣ ਇਸ਼ਾਰਾ ਕਰਦਾ ਫਿਰਦਾ ਏ।
ਹਿੱਕ ਤੇ ਸੜਦੀ ਪਈ ਏ ਮੇਰੀ ਧਰਤੀ ਦੀ,
ਬੱਦਲ ਖੌਰੇ ਕਿੱਥੇ ਵਰ੍ਹਦਾ ਫਿਰਦਾ ਏ?
ਬੰਦੇ ਜਿੰਨੀ ਕੋਈ ਮਖਲੂਕ ਵੀ ਭੁੱਖੀ ਨਈਂ,
ਬਚਿਆ ਆਪਣੇ ਕੱਲ੍ਹ ਲਈ ਧਰਦਾ ਫਿਰਦਾ ਏ।
ਚੰਗੇ ਦਾ ਲੜ ਫੜ ਕੇ, ਇੱਜ਼ਤਾਂ ਲੈਨਾ ਵਾਂ,
ਲੱਕੜੀ ਦੇ ਨਾਲ ਲੋਹਾ ਤਰਦਾ ਫਿਰਦਾ ਏ।
-0-
