9
ਕੀਹਨੂੰ ਲੈ ਕੇ ਲੰਘੇ ਅੱਜ ਬਾਜ਼ਾਰਾਂ 'ਚੋਂ'।
ਵਾਜ ਪਈ ਆਵੇ ਡਸਕਣ ਦੀ, ਦੀਵਾਰਾਂ 'ਚੋਂ'।
ਕੀਹਦੇ ਹੱਥ ਸਰੰਗੀ ਆ ਗਈ ਵੇਲੇ ਦੀ,
ਸੁਰ ਦੇ ਬਦਲੇ ਚੀਕਾਂ ਸੁਣੀਆਂ ਤਾਰਾਂ 'ਚੋਂ'।
ਕਿਉਂ ਕਰਨਾ ਏਂ ਉਹਦੀ ਤੂੰ ਪੜਚੋਲ ਪਿਆ,
ਬੋਲ ਪਵੇਗਾ ਆਪੇ ਉਹ ਕਿਰਦਾਰਾਂ 'ਚੋਂ'।
ਉਹਦੇ ਨਾਲੋਂ ਮੰਗਤਾ ਚੰਗਾ ਗਲੀਆਂ ਦਾ,
ਭੇਸ ਵਟਾ ਕੇ ਮੰਗੇ ਜੋ ਦਰਬਾਰਾਂ 'ਚੋਂ'।
ਆਪਣੀ ਜੇ ਪਹਿਚਾਣ ਕਰਾਉਣੀ ਦੁਨੀਆਂ ਨੂੰ,
ਉੱਡ ਜ਼ਰਾ ਜਿਆ ਵੱਖਰਾ ਹੋ ਕੇ ਡਾਰਾਂ 'ਚੋਂ।
ਨ੍ਹੇਰੇ ਵਿੱਚ ਖੁਸ਼ਬੂ ਵੀ ਅੰਨ੍ਹੀ ਹੁੰਦੀ ਏ,
ਫੁੱਲ ਕਦੀ ਨਈਂ ਲੱਭੇ 'ਬਾਬਾ' ਖਾਰਾਂ 'ਚੋਂ'।
-0-
