15
ਉਹਦੇ ਨਾਲ ਜਦੋਂ ਦੀ ਯਾਰੀ ਹੋ ਗਈ ਏ।
ਮੇਰੀ ਦੁਸ਼ਮਣ ਚਾਰ-ਦੀਵਾਰੀ ਹੋ ਗਈ ਏ।
ਮੇਲੇ ਵਿੱਚ ਵੀ ਜੀ ਨਹੀਂ ਕਰਦਾ ਹੱਸਣ ਨੂੰ,
ਜਿੰਦੜੀ ਏਹੋ ਜਹੀ ਦੁਖਿਆਰੀ ਹੋ ਗਈ ਏ।
ਮਾਪਿਆਂ ਕੋਲੋਂ ਪੁੱਤਰ ਲੈਣ ਹਿਸਾਬ ਪਏ,
ਦੁਨੀਆਂ ਕਿੰਨੀ ਕਾਰੋਬਾਰੀ ਹੋ ਗਈ ਏ।
ਵਰ੍ਹਿਆਂ ਮਗਰੋਂ ਵੇਖ ਕੇ ਉਸ ਦਾ ਨੰਗਾ ਮੂੰਹ,
ਬੁੱਢੀ ਸੱਧਰ ਫੇਰ ਕਵਾਰੀ ਹੋ ਗਈ ਏ।
ਧੁੱਪਾਂ ਵਿੱਚ ਵੀ ਸਾਡੇ ਪਿੰਡੇ ਠੰਢੇ ਨੇ,
ਸਾਨੂੰ ਕਿੱਥੋਂ ਇਹ ਬੀਮਾਰੀ ਹੋ ਗਈ ਏ।
ਰਾਵੀ ਵਿੱਚੋਂ' 'ਵਾਰਸ', 'ਰੂਮੀ' ਲੱਭਾ 'ਮੀਰ',
ਕਿਸਰਾਂ ਮੰਨਾ ਦੁਨੀਆਂ ਕਾਰੀ ਹੋ ਗਈ ਏ।
ਮੇਰੇ ਵਿੱਚ ਕਮੀਂ ਨਈਂ 'ਬਾਬਾ' ਉਹਨਾਂ ਨੂੰ,
ਆਪਣੇ ਉੱਤੇ ਬੇਇਤਬਾਰੀ ਹੋ ਗਈ ਏ।
-0-
