33
ਐਸੀ ਗੱਲ ਕਰਾ ਨਾ ਦੇਵੀਂ, ਕਿਧਰੇ ਮੇਰੇ ਕੋਲੋਂ।
ਮੂੰਹ ਲੁਕਾਉਣਾ ਪੈ ਨਾ ਜਾਵੇ, ਕੱਲ੍ਹ ਨੂੰ ਤੇਰੇ ਕੋਲੋਂ।
ਏਸ ਹਨੇਰੇ ਕੀ ਡੱਕਣੀ ਏਂ ਸੂਰਜ ਦੀ ਰੁਸ਼ਨਾਈ,
ਇੱਕ ਟਟਹਿਣਾ ਲੁਕ ਨਈਂ ਸਕਦਾ, ਏਸ ਹਨੇਰੇ ਕੋਲੋਂ।
ਹਲ ਦੀ ਜੰਘੀ ਨਈਂ ਜੇ ਫੜਨੀ, ਓਨਾ ਚਿਰ ਮੈਂ ਲੋਕੋ,
ਜਦ ਤਕ ਮੈਂ ਲਿਖਵਾ ਨਈਂ ਲੈਂਦਾ, ਅੱਧ ਵਡੇਰੇ ਕੋਲੋਂ।
ਸੱਪਾਂ ਦਾ ਗਲ ਘੁੱਟਣ ਨਾਲੋਂ, ਇੱਕ ਸਲਾਹ ਏ ਮੇਰੀ,
ਕਿਉਂ ਨਾ ਖੋਹੀਏ ਜਾ ਕੇ ਪਹਿਲਾਂ ਬੀਨ ਸਪੇਰੇ ਕੋਲੋਂ।
ਕਿਸਰਾਂ ਮੇਰੇ ਡੱਕਰੇ ਕੀਤੇ, ਨਾਲ ਬੇਦਰਦੀ ਰਾਜਾਂ,
ਕਿੰਨਿਆਂ ਜੁੱਧਾਂ ਨਾਲ ਬਣੀ ਸਾਂ, ਪੁੱਛ ਪਥੇਰੇ ਕੋਲੋਂ।
ਆਪਣੀ ਬੁੱਕਲੇ ਵਾੜ ਕੇ ਕਿਹੜਾ ਮੇਰੇ ਮੂੰਹ ਨੂੰ ਚੁੰਮੇ,
ਅੱਜ ਤੇ ਪਾਣੀ ਕੋਈ ਨਈਂ ਪੀਂਦਾ, ਹੱਥ ਸਲੇਰੇ ਕੋਲੋਂ।
ਸਾਰੇ ਪਿੰਡ 'ਚੋਂ ਤੇਰੇ ਪਿਓ ਦਾ, ਕੱਚਾ ਕੋਠਾ ‘ਗੁੱਡੂ',
ਕਿਸਰਾਂ ਮੰਗਣ ਰਿਸ਼ਤਾ ਤੇਰਾ ਲੋਕੀਂ ਮੇਰੇ ਕੋਲੋਂ।
-0-
