36
ਇਸ ਧਰਤੀ ਦਾ ਹਰ ਇੱਕ ਬੰਦਾ, ਆਪਣੀ ਆਪ ਮਿਸਾਲ।
ਕਾਲਾ, ਗੋਰਾ, ਝੂਠਾ, ਸੱਚਾ, ਆਪਣੀ ਆਪ ਮਿਸਾਲ।
ਸੂਰਜ ਦਾ ਇੱਕ ਆਪਣਾ ਰੁਤਬਾ, ਚੰਨ ਦੀ ਆਪਣੀ ਸ਼ਾਨ,
ਵਿੱਚ ਕੁੜਾਂ ਦੇ ਜਿਹੜਾ ਬਲਦਾ, ਆਪਣੀ ਆਪ ਮਿਸਾਲ।
ਤੀਰ 'ਅੰਨਾ' ਦਾ ਜੇ ਧਰ ਦੇਂਦਾ ਉਹ ਆਦਮ ਦੇ ਕੋਲ,
ਉਹਦਾ ਕੱਦ ਕਦੀ ਨਾ ਬਣਦਾ ਆਪਣੀ ਆਪ ਮਿਸਾਲ।
ਮੇਰੇ ਅੰਦਰ ਅਣਖ ਨਾ ਹੋਈ, ਗੱਲ ਵਿਆਹਵਣ ਜੋਗ,
ਕਿਸਰਾਂ ਬਣਦਾ ਚੱਪਾ ਤੇਸ਼ਾ ਆਪਣੀ ਆਪ ਮਿਸਾਲ।
ਕਦਮ ਕਦਮ ਤੇ ਔਕੜ ਸਹਿ ਕੇ, ਉਸ ਨੇ ਸਾਬਤ ਕੀਤਾ,
ਜੱਗ ਤੇ ਭੈਣ ਭਰਾ ਦਾ ਰਿਸ਼ਤਾ ਆਪਣੀ ਆਪ ਮਿਸਾਲ।
ਉਹਨੇ ਸ਼ੀਸ਼ ਮਹੱਲ ਬਣਵਾਇਆ ਇਹ ਨੇ ਉਸ ਦੇ ਭਾਗ,
ਮੇਰੇ ਲਈ ਏ ਕੱਚਾ ਕੋਠਾ ਆਪਣੀ ਆਪ ਮਿਸਾਲ।
ਮੈਨੂੰ ਨੀਂਦ ਨਈਂ ਆਉਣੀ 'ਬਾਬਾ' ਬਣਦਾ ਨਈ ਜਦ ਤੀਕ,
ਮੇਰੇ ਦੇਸ ਦਾ ਬੱਚਾ ਬੱਚਾ, ਆਪਣੀ ਆਪ ਮਿਸਾਲ।
-0-
