40
ਬੇਗ਼ਰਜ਼ਾਂ ਤੇ ਵੱਸਣ ਵਾਲਾ ਮੈਨੂੰ ਚੰਗਾ ਲੱਗਦਾ ਨਈਂ।
ਮਜ਼ਬੂਰਾਂ ਤੇ ਹੱਸਣ ਵਾਲਾ ਮੈਨੂੰ ਚੰਗਾ ਲੱਗਦਾ ਨਈਂ।
ਸੂਰਜ ਵਾਂਗ ਜਗਾ ਕੇ ਸਾੜੇ ਮੈਂ ਆ ਰਾਜ਼ੀ ਉਹਨਾਂ ਤੇ,
ਸੁੱਤੇ ਪਏ ਨੂੰ ਡੱਸਣ ਵਾਲਾ ਮੈਨੂੰ ਚੰਗਾ ਲੱਗਦਾ ਨਈਂ।
ਸੂਰਜ ਵਰਗੇ ਅਣਖੀ ਅੱਖਰ ਤੂੰ ਈ ਮੈਨੂੰ ਦਿੱਤੇ ਨੇ,
ਆਸਰਿਆਂ ਤੇ ਵੱਸਣ ਵਾਲਾ ਮੈਨੂੰ ਚੰਗਾ ਲੱਗਦਾ ਨਈਂ।
ਜਿਹੜੀ ਗੱਲ ਕਰਨ ਮੈਂ ਲੱਗਾਂ ਸੁਣ ਲਈ ਸੱਜਣ ਦੁਸ਼ਮਣ ਵੀ,
ਵਿੱਚ ਮੈਦਾਨੋਂ ਨੱਸਣ ਵਾਲਾ ਮੈਨੂੰ ਚੰਗਾ ਲੱਗਦਾ ਨਈਂ।
ਹੱਥ ਮੈਂ ਉਹਦੇ ਚੁੰਮਾਂ ਜਿਹੜਾ ਖਾਲੀ ਠੂਠੇ ਭਰਦਾ ਏ,
ਹੱਕ ਕਿਸੇ ਦਾ ਖੁੱਸਣ ਵਾਲਾ ਮੈਨੂੰ ਚੰਗਾ ਲੱਗਦਾ ਨਈਂ।
-0-
