43
ਇਸ ਦੁਨੀਆਂ ਤੋਂ ਜੋ ਵੀ ਜਿੱਤਾਂ, ਤੇਰੇ ਅੱਗੇ ਹਾਰ ਦਿਆਂ।
ਏਸੇ ਖੇਡ 'ਚ ਮਨਸ਼ਾ ਮੇਰੀ, ਸਾਰੀ ਉਮਰ ਗੁਜ਼ਾਰ ਦਿਆਂ।
ਇੰਝ ਲਗਦਾ ਏ ਮੇਰੀ ਗੁੱਡੋ ਮੇਰੇ ਈ ਭਾਂਡੇ ਮਾਂਜੇਗੀ,
ਇਹਨੂੰ ਤੋਰਨ ਲਈ ਮੈਂ ਕਿੱਥੋਂ ਟੀ.ਵੀ., ਮੋਟਰ, ਕਾਰ ਦਿਆਂ।
ਨਵੇਂ ਰਿਵਾਜਾਂ ਜਿਹੜਾ ਕੀਤਾ, ਹਮਸਾਏ ਦੀ ਧੀ ਦਾ ਹਾਲ,
ਵੇਖ ਕੇ ਮੇਰਾ ਜੀ ਕਰਦਾ ਏ ਆਪਣੀ ਲਾਡੋ ਮਾਰ ਦਿਆਂ।
ਮਰਨਾ ਜੀਣਾ ਨਾਲ ਅਣਖ ਦੇ, ਵਿਰਸੇ ਦੇ ਵਿੱਚ ਮਿਲਿਆ ਏ,
ਜਿੰਨਾ ਚਿਰ ਤੱਕ ਧੌਣ ਸਲਾਮਤ, ਕਿਸਰਾਂ ਬਾਜ਼ੀ ਹਾਰ ਦਿਆਂ।
ਦੁਸ਼ਮਣ ਮੈਥੋਂ ਮੰਗ ਰਿਹਾ ਏ, ਮੇਰੀ ਇੱਕ ਹੱਯਾਤੀ ਨੂੰ,
ਮੈਨੂੰ ਲੱਖਾਂ ਵਾਰ ਵੀ ਲੱਭੇ, ਇਸ ਧਰਤੀ ਤੋਂ ਵਾਰ ਦਿਆਂ।
ਖੌਰੇ ਕਿਹੜੀ ਸੱਧਰ ਲੈ ਕੇ ਆਇਆ ਮੇਰੇ ਬੂਹੇ 'ਤੇ, ਇਹਦੀ ਗੱਲ ਸੁਣਨ ਤੋਂ ਪਹਿਲਾਂ,
ਕਿਸਰਾਂ ਕਰ ਇਨਕਾਰ ਦਿਆਂ।
ਜਿਹੜੀ ਗੱਲ ਨਾ 'ਕੱਠੀ ਹੋਵੇ, ਕਈ ਹਜ਼ਾਰਾਂ ਲਫਜ਼ਾਂ ਵਿੱਚ,
ਮੇਰੇ ਵਿੱਚ ਫਨਕਾਰੀ ਐਨੀ, ਮਿਸਰੇ ਵਿੱਚ ਖਲਾਰ ਦਿਆਂ।
ਹਰ ਪਰ੍ਹਿਆ 'ਚੋਂ ਲੈ ਕੇ ਉੱਠਾਂ ਆਪਣੇ ਫਨ ਦੀ ਮਾਲੀ ਮੈਂ,
ਅੱਜ ਪੰਜਾਬੀ ਗ਼ਜ਼ਲ ਨੂੰ 'ਬਾਬਾ', ਏਹੋ ਜਿਹਾ ਸ਼ਿੰਗਾਰ ਦਿਆਂ।
-0-
