45
ਆਪਣੀ ਸੋਚ ਨੂੰ ਜਿਹਨਾਂ ਦਿੱਤਾ, ਤਕਦੀਰਾਂ ਦੇ ਚੱਕਰ ਵਿੱਚ।
ਹੱਥ ਕਦੇ ਵੀ ਪਾ ਨਈਂ ਸਕਦੇ ਤਹਿਮੀਰਾਂ ਦੇ ਚੱਕਰ ਵਿੱਚ।
ਮੰਜ਼ਿਲ ਵੱਲੇ ਮੈਂ ਟੁਰਿਆ ਵਾਂ ਸੂਰਜ ਲੈ ਕੇ ਜਜ਼ਬੇ ਦਾ,
ਫਿਰ ਮੈਂ ਕਿਸਰਾਂ ਆ ਸਕਨਾ ਵਾਂ ਰਾਹਗੀਰਾਂ ਦੇ ਚੱਕਰ ਵਿੱਚ।
ਮੇਰੀ ਸੋਚ ਅਵਾਮੀਂ ਤੇਰਾ ਕਿੰਝ ਕਸੀਦਾ ਲਿਖਾਂ ਮੈਂ,
ਮੇਰੇ ਜਹੇ ਫਨਕਾਰ ਨਈਂ ਆਉਂਦੇ, ਜਾਗੀਰਾਂ ਦੇ ਚੱਕਰ ਵਿੱਚ।
'ਨੇਰ੍ਹਾ ਆਪੇ ਦੱਸ ਦਵੇਗਾ, ਦੀਵਾ ਕਿੱਥੇ ਬਲਦਾ ਏ,
ਟੁਰ ਤੇ ਸਹੀ ਤੂੰ ਹਿੰਮਤ ਕਰ ਕੇ, ਤਨਵੀਰਾਂ ਦੇ ਚੱਕਰ ਵਿੱਚ।
ਤੇਰੇ ਵਾਂਗ ਕਨੂੰਆਂ ਕੱਢਣ, ਤੋਬਾ ਬਹਿ ਨਾ ਜਾਵਾਂ ਮੈਂ,
ਮੁੱਲਾਂ ਬਹੁਤਾ ਪਾ ਨਾ ਮੈਨੂੰ ਤਫਸੀਰਾਂ ਦੇ ਚੱਕਰ ਵਿੱਚ।
'ਬਾਬਾ' ਅੱਜ ਸੁਣਾ ਕੇ ਸੁਫਨਾ, ਸੀਨੇ ਰੰਗਲੇ ਮਹਿਲਾਂ ਦਾ,
ਸੋਚ ਮੇਰੀ ਨੂੰ ਪਾ ਦਿੱਤਾ ਏ ਤਹਿਬੀਰਾਂ ਦੇ ਚੱਕਰ ਵਿੱਚ।
-0-
