46
ਦਿਲ 'ਚੋਂ ਕਿਸਰਾਂ ਉਹਦੀ ਯਾਦ ਭੁਲਾ ਦੇਵਾਂ।
ਕਿੰਝ ਸਮੁੰਦਰ ਫੜ ਕੇ ਮੈਂ ਉਲਟਾ ਦੇਵਾਂ।
ਮੇਰੇ ਵੱਸ ਵਿੱਚ ਹੋਵੇ ਕਸਮੇਂ ਅੱਲਾ ਦੀ,
ਹਰ ਤਾਰੇ 'ਤੇ ਤੇਰਾ ਨਾਂ ਲਿਖਵਾ ਦੇਵਾਂ।
ਮੇਰੇ ਜਜ਼ਬੇ 'ਤੇ ਨੇ ਤੇਰੀ ਸੇਵਾ ਲਈ,
ਅਸਮਾਨਾਂ ਤੋਂ ਹੂਰਾਂ ਮੈਂ ਮੰਗਵਾ ਦੇਵਾਂ।
ਪੀਤਿਆਂ ਮੌਤ ਨਈਂ ਆਉਂਦੀ ਜਿਹੜੇ ਪਾਣੀ ਨੂੰ,
ਵੇਚ ਹਯਾਤੀ ਤੈਨੂੰ ਮੁੱਲ ਲਿਆ ਦੇਵਾਂ।
ਆਪਣੇ ਦੀਵੇ ਬਾਲਾਂ ਵਿੱਚ ਹਨੇਰੇ ਦੇ,
ਸਿਖਰ ਦੁਪਹਿਰਾਂ ਵਰਗਾ ਰੰਗਾ ਵਿਖਾ ਦੇਵਾਂ।
ਇੱਕ ਦੂਜੇ ਨੂੰ ਰੰਗ ਨਸਲ ਨਾ ਪੁੱਛਣ ਲੋਕ,
ਏਹੋ ਜਿਹਾ ਮੈਂ ਕਿੱਥੇ ਸ਼ਹਿਰ ਵਸਾ ਦੇਵਾਂ।
ਤੁਸੀਂ ਜੇ ਚੱਲੋ ਜੋੜ ਕੇ ਮੋਢਾ ਮੇਰੇ ਨਾਲ,
ਮੈਂ ਧਰਤੀ ਤੋਂ ਕਾਲੀ ਰਾਤ ਮੁਕਾ ਦੇਵਾਂ।
-0-
