17
ਵਿੱਚ ਉਡੀਕਾਂ ਹੋ ਨਾ ਜਾਵੇ ਸ਼ਾਮ ਕਿਤੇ।
ਸੱਖਣਾ ਰਹਿ ਨਾ ਜਾਵੇ, ਮੇਰਾ ਨਾਮ ਕਿਤੇ।
ਕਿੱਡਾ ਸੀ ਪੰਜਾਬ ਤੁਹਾਡਾ ਪੁੱਛਾਂ ਮੈਂ,
ਮੱਥੇ ਲੱਗਣ 'ਜੱਬਰੂ' ਤੇ 'ਵਰਿਆਮ' ਕਿਤੇ।
ਟੋਟੇ ਹੋਣਗੇ ਏਨੇ ਗਿਣਤੀ ਪੱਟੇਗੀ,
ਮੌਲਵੀਆਂ ਦਾ ਮੰਨਿਆਂ ਜੇ ਇਸਲਾਮ ਕਿਤੇ।
ਕਿਧਰੇ ਵਿਲਕਣ ਬੁੱਲ੍ਹੀਆਂ ਗਾਜਰ ਮੂਲੀ ਲਈ,
ਖੀਸਾ ਭਰਿਆ ਪਿਸਤੇ ਨਾਲ ਬਦਾਮ ਕਿਤੇ।
ਕੋਈ ਵੀ ਤੇਲ ਨਈਂ ਪਾਉਂਦਾ, ਸ਼ੌਕ ਚਲਾਵਣ ਦਾ,
ਕਰ ਨਾ ਦੇਵਣ ਗੱਡੀ ਮੇਰੀ ਨਾਮ ਕਿਤੇ।
ਅਸੀਂ ਤੇ ਐਵੇਂ ਜੁੱਤੀਓਂ-ਜੁੱਤੀ ਹੁੰਨੇ ਆਂ,
ਉਹ ਤੇ ਕਿਧਰੇ ਅੱਲਾ ਕਿਧਰੇ ਰਾਮ ਕਿਤੇ।
ਰਮਲੀ ਕੋਲੋਂ ਬਾਬਾ ਨਜ਼ਮੀ ਪੁੱਛ ਲਵਾਂ,
ਰੱਜਵਾਂ ਟੁੱਕਰ ਲਿਖਿਆ ਮੇਰੇ ਨਾਮ ਕਿਤੇ।
-0-
