22
ਸ਼ੀਸ਼ੇ ਦੇ ਲਿਸ਼ਕਾਰੇ ਚੁੱਪ।
ਸੂਰਜ, ਚੰਨ ਤੇ ਤਾਰੇ ਚੁੱਪ।
ਰੋਂਦੀ ਪਈ ਏ ਹੀਰ ਸਿਆਲ,
ਰਾਂਝਾਂ ਤਖ਼ਤ ਹਜ਼ਾਰੇ ਚੁੱਪ।
ਆਪਣੀ ਚੱਲੇ ਕੈਂਚੀ ਵਾਂਗ,
ਮੈਨੂੰ ਕਰੇ ਇਸ਼ਾਰੇ ਚੁੱਪ।
ਵਿੱਚ ਹਵੇਲੀ ਬੋਹਲ ਗਿਆ,
ਢੱਗਿਆਂ ਕੋਲ ਮੁਜ਼ਾਰੇ ਚੁੱਪ।
ਕੱਲ੍ਹ ਵੀ ਸਾਨੂੰ ਲਾਰੇ ਸਨ,
ਅੱਜ ਵੀ ਸਾਨੂੰ ਲਾਰੇ ਚੁੱਪ।
ਉਹ ਵੀ ਬੇਇਤਬਾਰੇ ਸਨ,
ਇਹ ਵੀ ਬੇਇਤਬਾਰੇ, ਚੁੱਪ।
ਅੱਜ ਦਿਹਾੜੀ ਲੱਗੀ ਨਈਂ,
ਅੱਜ ਵੀ ਫੜੇ ਹੁਧਾਰੇ ਚੁੱਪ।
ਜਿੱਤਣ ਵਾਲੇ ਰੌਣ ਪਏ,
ਵਿੱਚ ਮੈਦਾਨੇ ਹਾਰੇ ਚੁੱਪ।
'ਬਾਬਾ' ਤੂੰ ਵੀ ਹਾਰ ਗਿਆਂ,
ਤੇਰੇ ਢੋਲ ਨਗਾਰੇ ਚੁੱਪ।
-0-
