23
ਜ਼ਾਲਮ ਕੋਲੋਂ ਗ਼ਮ ਦਾ ਦਾਰੂ ਲਭਨਾ ਵਾਂ।
ਸੱਪ ਦੀ ਅੱਖ 'ਚੋਂ ਆਪਣਾ ਦਾਰੂ ਲੱਭਨਾ ਵਾਂ।
ਬਘਿਆੜਾਂ ਦੀ ਜੂਹ 'ਚੋਂ ਟੋਲਾ/ਹਰਨਾਂ ਦਾ,
ਚੰਡੂਖਾਨੇ ਵਿੱਚੋਂ 'ਗੱਭਰੂ' ਲੱਭਨਾ ਵਾਂ।
ਸੰਗਲ ਪਿੰਜਰੇ ਲੱਭਨਾ ਵਾਂ ਇਨਸਾਨਾਂ ਲਈ,
ਡੰਗਰਾਂ ਦੇ ਲਈ ਫੁੰਮਣ ਘੁੰਗਰੂ ਲੱਭਨਾ ਵਾਂ।
ਵਾਰਸ, ਬੁੱਲ੍ਹਾ, ਵਿਰਸੇ ਵਿੱਚ 'ਫਰੀਦ' ਪਿਆ,
ਫਿਰ ਵੀ ਅਫਲਾਤੂਨ, ਅਰਸਤੂ ਲੱਭਨਾ ਵਾਂ।
ਜੰਡ ਕਰੀਰਾਂ ਉੱਤੇ ਫੁੱਲ ਗੁਲਾਬਾਂ ਦੇ,
ਸਰਕੜਿਆਂ 'ਚੋਂ ਗੰਦਲਾਂ, ਬਾਥੂ ਲੱਭਨਾ ਵਾਂ।
ਜਿਸ ਦੇ ਅੱਖਰ ਤਖ਼ਤ ਹਿਲਾਵਣ ਜ਼ਾਲਮ ਦਾ,
ਏਹੋ ਜਿਹਾ ਮੈਂ ਇੱਕ ਲਿਖੇਰੂ ਲੱਭਨਾ ਵਾਂ।
ਪੁੱਛੇ ਕੋਈ ਤੇ ਦਸਾਂ ‘ਬਾਬਾ' ਕਾਹਦੇ ਲਈ,
ਭਗਤ ਸਿੰਘ ਤੇ ‘ਦੁੱਲ੍ਹਾ’, 'ਜੱਬਰੂ' ਲੱਭਨਾ ਵਾਂ।
-0-
