32
ਮੈਂ ਵੀ ਝੂਠ ਬਥੇਰਾ ਲਿਖਨਾ, ਮੈਨੂੰ ਵੀ ਇਹਜਾਜ਼ ਦਿਓ।
ਲੱਥੇ ਰਾਤ, ਸਵੇਰਾ ਲਿਖਨਾ, ਮੈਨੂੰ ਵੀ ਇਹਜਾਜ਼ ਦਿਓ।
ਝੁੱਗੀਆਂ ਅੰਦਰ ਚਾਨਣ ਏਨਾ, ਫਿਰਦੀ ਕੀੜੀ ਦਿਸਦੀ ਏ,
ਮਹਿਲੀਂ ਘੁੱਪ ਹਨ੍ਹੇਰਾ ਲਿਖਨਾਂ, ਮੈਨੂੰ ਵੀ ਇਹਜਾਜ਼ ਦਿਓ।
ਕਬਰਾਂ ਉੱਤੇ ਫੁੱਲ ਚੜ੍ਹਾਵਾਂ, ਦੀਵੇ ਦੇਵਾਂ ਅੰਨ੍ਹਿਆਂ ਨੂੰ,
ਜੰਗਲ ਨੂੰ ਮੈਂ ਡੇਰਾ ਲਿਖਨਾ, ਮੈਨੂੰ ਵੀ ਇਹਜਾਜ਼ ਦਿਓ।
ਹਿਜਰੇ ਅਸੂਦ, ਕਾਲਾ ਨਈਂ ਜੇ, ਵੇਖੋ ਅੱਤ ਖਿਆਲਾਂ ਨੂੰ,
ਚੰਨ ਦਾ ਰੰਗ ਸਲੇਰਾ ਲਿਖਨਾ, ਮੈਨੂੰ ਵੀ ਇਹਜਾਜ਼ ਦਿਓ।
ਅੱਲਾ ਨਈਂ ਅਸਮਾਨਾ ਉੱਤੇ, ਪੈਰਾਂ ਥੱਲੇ ਧਰਤੀ ਨਈਂ,
ਅਪਣਾ ਕੱਦ ਉਚੇਰਾ ਲਿਖਨਾ, ਮੈਨੂੰ ਵੀ ਇਹਜਾਜ਼ ਦਿਓ।
ਲੋਕਾਂ ਵਾਂਗੂੰ ਆਦੀ ਨਈਂ ਮੈਂ, ਇੱਕੇ ਪਾਸੇ ਵੇਖਣ ਦਾ,
ਆਪਣਾ ਚਾਰ-ਚੁਫੇਰਾ ਲਿਖਨਾ ਮੈਨੂੰ ਵੀ ਇਹਜਾਜ਼ ਦਿਓ।
ਇਸ ਧਰਤੀ ਨੂੰ ਲੁੱਟਣ ਵਾਲੇ, 'ਬਾਬਾ' ਜੀ ਇਸਲਾਮਪੁਰੇ,
ਕਿੱਡਾ ਵੱਡਾ ਜੇਰਾ ਲਿਖਨਾਂ, ਮੈਨੂੰ ਵੀ ਇਹਜਾਜ਼* ਦਿਓ।
(ਇਹਜਾਜ਼* = ਪੁਰਸਕਾਰ)
-0-
