33
ਏਧਰ ਕੀਤੀ ਸੱਜਣਾ ਨੇ ਤਕੀਦ ਸ਼ੁਰੂ।
ਓਧਰ ਮੇਰੇ ਦੁਸ਼ਮਣ ਦੀ ਏ ਈਦ ਸ਼ੁਰੂ।
ਕਾਤਲ ਸੀ ਉਹ ਸ਼ਾਮ ਦੀਆਂ ਅਖਬਾਰਾਂ ਵਿੱਚ,
ਫਜਰ ਦੀਆਂ ਅਖਬਾਰਾਂ ਵਿੱਚ ਤਰਦੀਦ ਸ਼ੁਰੂ।
ਏਹੋ ਜਹੇ ਮੈਂ ਇੱਕ ਦਿਨ ਲੀੜੇ ਪਾਵਾਂਗਾ,
ਸਾਰਾ ਪਿੰਡ ਕਰੇਗਾ ਮੇਰੀ ਦੀਦ ਸ਼ੁਰੂ।
ਘੁੱਗੂ-ਘੋੜੇ ਸਾਨੂੰ ਵੀ ਪਏ ਦਿਸਦੇ ਨੇ,
ਖਾਲੀ ਖੀਸੇ ਕਰੀਏ ਕਿੰਝ ਖਰੀਦ ਸ਼ੁਰੂ।
ਪਹਿਲਾਂ ਤੋਂ ਮੰਨਵਾ ਲੈ ਮੇਰਾ ਅੰਦਰ ਦਾ,
ਫੇਰ ਕਰਾਂਗਾ ਢੋਲਾਂ ਨਾਲ ਤਾਈਦ ਸ਼ੁਰੂ।
ਹਿੰਮਤ ਕਰਕੇ ਜਿਹੜੇ ਲੋਕੀਂ ਟੁਰ ਪਏ ਨੇ,
ਮੇਰੇ ਵੱਲੋਂ ਮੰਜ਼ਿਲ ਦੀ ਉਮੀਦ ਸ਼ੁਰੂ।
ਭੁੜਕ ਪਿਆਂ ਏਂ, ਅਜੇ ਤੇ ਉਹਦੇ ਜ਼ੁਲਮਾਂ ਦੀ,
'ਬਾਬਾ ਨਜਮੀਂ' ਕੀਤੀ ਏ ਤਸਹੀਦ ਸ਼ੁਰੂ।
(ਤਸਹੀਦ = ਭੂਮਿਕਾ)
-0-
