38
ਖੌਰੇ ਕਿੱਥੇ ਹਾਰ ਗਈਆਂ ਨੇ ਕੁੜੀਆਂ ਮੇਰੇ ਹਾਣ ਦੀਆਂ।
ਸੱਧਰਾਂ ਦਰਿਆ ਕਰ ਗਈਆਂ ਨੇ, ਕੁੜੀਆਂ ਮੇਰੇ ਹਾਣ ਦੀਆਂ।
ਚਿੱਟੀਆਂ ਚੱਦਰਾਂ ਦੇ ਨਾਲ ਆਪਣੇ ਕਾਲੇ ਮੂੰਹ ਨਾ ਸਾਫ਼ ਕਰੋ,
ਸ਼ਾਮੋਂ ਪਹਿਲਾਂ ਘਰ ਗਈਆਂ ਨੇ, ਕੁੜੀਆਂ ਮੇਰੇ ਹਾਣ ਦੀਆਂ।
ਅੱਖ ਜ਼ਰਾ ਜਹੀ ਨੀਵੀਂ ਕਰਕੇ ਉਹਨਾਂ ਨੂੰ ਮੈਂ ਮਿਲਿਆ ਵਾਂ,
ਮੇਰੀ ਪੂਜਾ ਕਰ ਗਈਆਂ ਨੇ, ਕੁੜੀਆਂ ਮੇਰੇ ਹਾਣ ਦੀਆਂ।
ਮੇਰੇ ਸ਼ਹਿਰ 'ਚ ਦਾਜਾਂ ਬਾਝੋਂ ਲੱਖਾਂ ਵਿਹੜੇ ਬਾਬਲ ਦੇ,
'ਬਾਬਾ ਨਜਮੀਂ' ਮਰ ਗਈਆਂ ਨੇ, ਕੁੜੀਆਂ ਮੇਰੇ ਹਾਣ ਦੀਆਂ।
ਮੈਂ ਤੇ ਨੰਗੇ ਸਿਰ ਕੱਜਣ ਲਈ, ਚੱਦਰਾਂ ਲੈ ਕੇ ਆਇਆ ਵਾਂ,
ਕਿਹੜੀ ਗੱਲੋਂ ਡਰ ਗਈਆਂ ਨੇ, ਕੁੜੀਆਂ ਮੇਰੇ ਹਾਣ ਦੀਆਂ।
-0-
