40
ਉੱਚਾ ਕਿੰਝ ਨਾ ਕਰੀਏ ਬੋਲ ਪੰਜਾਬੀ ਦਾ।
ਅੰਮੜੀ ਪਾਇਆ ਗਲ ਵਿੱਚ ਢੋਲ ਪੰਜਾਬੀ ਦਾ।
ਹੈਨੀ ਗੱਲ ਕਦੇ ਵੀ ਤੈਨੂੰ ਲੱਭਣੀ ਨਈਂ,
ਜਿੰਨਾ ਮਰਜ਼ੀ ਸੀਨਾ ਫੋਲ ਪੰਜਾਬੀ ਦਾ।
ਬਣ ਜਾਂਦੇ ਨੇ ਮਾਮੇ ਆ ਕੇ ਏਧਰ ਵੀ,
ਮਿਸਰਾ ਵੀ ਨਈਂ ਜਿਹਨਾਂ ਕੋਲ ਪੰਜਾਬੀ ਦਾ।
ਵਿੱਚ ਮੈਦਾਨੇ ਆਵੀਂ, ਤੱਕਣਾ ਹੋਵੇ ਤੇ,
ਗਲੀਆਂ ਵਿੱਚ ਨਈਂ ਵੱਜਦਾ ਢੋਲ ਪੰਜਾਬੀ ਦਾ।
ਗੈਰਾਂ ਨਾਲੋਂ ਬਹੁਤੇ ਪੁੱਤ ਪੰਜਾਬੀ ਦੇ,
ਕਰਦੇ ਪਏ ਨੇ ਬਿਸਤਰ ਗੋਲ ਪੰਜਾਬੀ ਦਾ।
ਸਦੀਆਂ ਤੀਕਰ ਮੇਰੇ ਕੋਲੋਂ ਮੁੱਕਣਾ ਨਈਂ,
ਐਨਾ ਵਿਰਸਾ ਮੇਰੇ ਕੋਲ ਪੰਜਾਬੀ ਦਾ।
ਮਾਂ ਬੋਲੀ ਨੂੰ ਬੋਲਣ ਲੱਗਾ ਸੰਗਾਂ ਕਿਉਂ,
ਪਾਇਆ ਤੇ ਨਈਂ 'ਬਾਬਾ' ਖੋਲ ਪੰਜਾਬੀ ਦਾ।
-0-
