ਪੰਜਾਬ ਦੀ ਸੁਲੱਖਣੀ ਧਰਤੀ
ਉਸ ਵਿੱਚ ਲਾਲੀ ਪੰਜਾਬ ਦੇ ਖੂਨ ਦੀ ਏ,
ਜੋ ਆਜ਼ਾਦੀ ਦਾ ਖਿੜਿਆ ਗੁਲਾਬ ਦਿਸਦੈ ।
ਕਰਦੀ ਨਾਚ ਜਵਾਨੀ ਜੋ ਪਰਬਤਾਂ ਤੇ,
ਭਗਤ ਸਿੰਘ ਦਾ ਉਸ ਵਿੱਚ ਸ਼ਬਾਬ ਦਿਸਦੈ ।
ਪਿਤਾ, ਪੁੱਤਾਂ ਨੂੰ ਮੌਤ ਦਾ ਰਾਹ ਦਸਦੈ,
ਪੂਰਾ ਹੁੰਦਾ ਦਸ਼ਮੇਸ਼ ਦਾ ਖਾਬ ਦਿਸਦੈ ।
ਉਡਦਾ ਪਿਆ ਤਰੰਗਾ ਜੋ ਅਰਸ਼ ਉੱਤੇ
ਉਹਦੇ ਵਿੱਚ ਸਮੁੱਚਾ ਪੰਜਾਬ ਦਿਸਦੇ ।
ਜਿਹੜੇ ਦੇਸ਼ ਨੇ ਨਲ੍ਹਵੇ ਨੂੰ ਜਨਮ ਦਿੱਤਾ,
ਉਹ ਪੰਜਾਬ ਦੀ ਧਰਤ ਸੁਲੱਖਣੀ ਏਂ ।
ਜਿਸ ਨੇ ਦੇਸ਼ ਦੀ ਅਣਖ ਲਈ ਸੀਸ ਦਿੱਤਾ,
ਉੱਚੀ ਪੱਗ ਅਸਾਂ ਉਹਦੀ ਰੱਖਣੀ ਏਂ ।
ਰਲ ਕੇ ਆਓ ਪੰਜਾਬੀਓ ਸੌਂਹ ਖਾਈਏ,
ਨੀਂ'ਵਾਂ ਦੇਸ਼ ਦਾ ਮਾਨ ਨਹੀਂ ਹੋਣ ਦੇਣਾ।
ਲਹੂ ਦੀ ਨਦੀ 'ਚ ਰੋੜ੍ਹਣੇ ਵੈਰੀਆਂ ਨੂੰ,
ਮਾਂ ਦੀ ਹਿੱਕ ਤੇ ਨਹੀਂ ਖਲੋਣ ਦੇਣਾ ।
ਤੜਪ ਰਹੇ ਪਿਆਸਿਆਂ ਦੁਸ਼ਮਣਾਂ ਦੇ,
ਮੂੰਹ ਵਿੱਚ ਪਾਣੀ ਨਹੀਂ ਕਿਸੇ ਨੂੰ ਚੋਣ ਦੇਣਾ ।
