13. ਹੋਸ਼-ਮਸਤੀ

'ਕਿਉਂ ਹੋਯਾ ?' ਤੇ 'ਕੀਕੂੰ ਹੋਯਾ ?'

ਖਪ ਖਪ ਮਰੇ ਸਿਆਣੇ,-

ਓਸੇ ਰਾਹ ਪਵੇਂ ਕਿਉਂ ਜਿੰਦੇ !

ਜਿਸ ਰਾਹ ਪੂਰ ਮੁਹਾਣੇ,

ਭਟਕਣ ਛੱਡ, ਲਟਕ ਲਾ ਇਕੋ,

ਖੀਵੀ ਹੋ ਸੁਖ ਮਾਣੀਂ,

ਹੋਸ਼ਾਂ ਨਾਲੋਂ ਮਸਤੀ ਚੰਗੀ

ਰਖਦੀ ਸਦਾ ਟਿਕਾਣੇ ।੧੪।

 

14. ਮਗਨਤਾ

ਬਾਗ਼ ਅਦਨ ਵਿਚ ਵਸਦਿਆਂ ਆਦਮ

ਕਣਕ, ਆਖਦੇ ਖਾਧੀ,-

ਧੱਕਿਆ ਗਿਆ ਬਾਗ਼ ਤੋਂ ਸ਼ੁਹਦਾ

ਕੀਤਾ ਗਿਆ ਅਪਰਾਧੀ:

ਭਬਕੇ ਪਾ ਕੇ ਕਣਕ ਚੁਆਂਦਾ

ਰਸ ਪੀਂਦਾ ਜੇ ਆਦਮ,

ਅਦਨੋਂ ਹੋਰ ਉਚੇਰਾ ਹੁੰਦਾ,

ਅਟਲ ਮੱਲਦਾ ਗਾਧੀ ।੧੫।

 

(ਸ਼ੁਹਦਾ=ਵਿਚਾਰਾ, ਗਾਧੀ=ਅਮਰ ਪਦ)

 

15. ਹਠ-ਰਸ

ਨਾ ਕਰ ਤਪ ਸਿੰਗੀ ਰਿਖ ਹਠੀਏ !

ਰੁੱਸ ਨ ਕੁਦਰਤ ਨਾਲੋਂ,

ਲੁਕਵੇਂ ਤੇਜ ਵਸਣ ਇਸ ਅੰਦਰ,

ਸੂਖਮ ਹਨ ਜੋ ਵਾਲੋਂ,

ਹਠ ਤੋਂ ਟੱਪ, ਰੰਗੀਜ ਰੰਗ ਵਿਚ,

ਰਸੀਆ ਹੋ ਰਸ ਜਿੱਤੀਂ,

ਇਕ ਝਲਕਾਰੇ ਵਿਚ ਨਹੀਂ ਏ

ਗੁਆ ਦੇਸਣ ਇਸ ਹਾਲੋਂ ।੧੬।