19. ਅੱਜੋ

ਅੱਜੋ ਪੀ ਤੇ ਹੁਣ ਹੀ ਪੀ ਤੇ-

ਪੀਂਦਾ ਪੀਂਦਾ ਜਾਈਂ,

'ਪਿਰਮ-ਰਸਾਂ' ਦੇ ਪਯਾਲੇ ਨਾਲੋਂ

ਲਾਏ ਬੁੱਲ੍ਹ ਨ ਚਾਈਂ,

ਹਰਦਮ ਪੀ ਤੇ ਖੀਵਾ ਹੋ ਰਹੁ

ਇਹ ਮਸਤੀ ਨ ਉਤਰੇ,-

ਕਲ ਨੂੰ ਖ਼ਬਰੇ ਕਾਲ ਆਇਕੇ

ਦੇਵੇ ਖਾਕ ਰਲਾਈ ।੨੨।

 

20. ਲੱਗੀਆਂ ਨਿੱਭਣ

ਪੱਥਰ ਨਾਲ ਨੇਹੁੰ ਲਾ ਬੈਠੀ-

ਨਾ ਹੱਸੇ ਨਾ ਬੋਲੇ,

ਸੁਹਣਾ ਲੱਗੇ ਮਨ ਨੂੰ ਮੋਹੇ

ਘੁੰਡੀ ਦਿਲੋਂ ਨ ਖੁਹਲੇ,

ਛੱਡਯਾਂ ਛੱਡਿਆ ਜਾਂਦਾ ਨਾਹੀਂ,

ਮਿਲਿਆਂ ਨਿੱਘ ਨ ਕੋਈ:

ਹੱਛਾ ਜਿਵੇਂ ਰਜ਼ਾ ਹੈ ਤੇਰੀ,

ਅੱਖੀਅਹੁੰ ਹੋਹੁ ਨ ਉਹਲੇ ।੨੩।

 

21. ਭੈ ਵਿਚ

ਬੱਦਲ ਆਇਆ ਦੇਖ ਕੰਬਿਆ

ਪਰਬਤ, -ਸ਼ੋਰ ਮਚਾਇਆ:

'ਮਿੱਠੇ ਬਣ ਅੰਦਰ ਵੜ ਲੋਟੂ

ਫਿਰ ਫੇਰਾ ਆ ਪਾਇਆ ?

'ਕੱਜਣ ਐਡਾ ਕਿੱਥੋਂ ਲਯਾਵਾਂ ?

ਲਵੇ ਲੁਕਾ ਜੋ ਮੈਨੂੰ ।

'ਹੇ ਸਰਪੋਸ਼ ਜਗਤ ਦੇ ਓਲ੍ਹਣ !

ਰੱਖੋ ਕਰਕੇ ਦਾਇਆ' ।੨੪।

ਮਿੱਠੀ ਖਿਰਨ ਬੋਲਿਆ ਬੱਦਲ

ਹਿਰਦਾ ਚਮਕ ਦਿਖਾਇਆ :-

'ਲੇਖਾ ਸਾਫ ਨ ਮੈਂ ਕੁਛ ਪੱਲੇ,

ਤੈਂ ਦਿੱਤਾ ਵੰਡ ਆਇਆ;

'ਉਹ ਦਾਤਾ, ਭੰਡਾਰੀ ਤੂੰ ਹੈਂ

ਮੈਂ ਹਾਂ ਵੰਡਣ ਹਾਰਾ,

'ਭੈ ਵਿਚ ਕਾਰ ਤੁਸਾਂ ਮੈਂ ਕਰਨੀ-

ਸਭ ਮਾਲਕ ਦੀ ਮਾਇਆ' ।੨੫।