ਗੀਤ - ਮਾਂ ਦੀ ਉਡੀਕ

ਮੇਰਾ ਮਨ ਨਾ ਭਰ ਆਵੇ, ਆਪਣਾ ਮਨ ਲਕਾਉਂਦੀ ਹੋਣੀ ਆ

ਮੈਂ ਛੇਤੀ ਘਰ ਨੂੰ ਮੁੜ ਆਵਾਂ, ਮਾਂ ਇਹ ਚਾਹੁੰਦੀ ਹੋਣੀ ਆ

 

ਵੀਡਿਓ ਕਾਲ ‘ਤੇ ਅੱਖ ਭਰਕੇ, ਮੂੰਹ ਪਾਸੇ ਕਰ ਲੈਂਦੀ

ਹੌਕਾ ਜਿਹਾ ਭਰਕੇ ਪਤਾ ਨਹੀਂ ਕਿੰਝ ਧੀਰਜ ਧਰ ਲੈਂਦੀ

ਮੇਰੀਆਂ ਸੱਭੇ ਖ਼ੈਰਾਂ ਹੋਵਣ ਉਹ ਰੱਬ ਮਨਾਉਂਦੀ ਹੋਣੀ ਆ

ਮੈਂ ਛੇਤੀ ਘਰ ਨੂੰ ਮੁੜ ਆਵਾਂ, ਮਾਂ ਇਹ ਚਾਹੁੰਦੀ ਹੋਣੀ ਆ

 

ਫ਼ਿਕਰ ਹੋਣਾ ਉਹਨੂੰ ਇਹ ਵੀ ਨਾ ਮੈਂ ਕੇਸ ਕਟਾ ਦੇਵਾਂ

ਬਾਪੂ ਦੀ ਦਿੱਤੀ ਪਗੜੀ ਨਾ ਸ਼ਹਿਰਾਂ ਵਿੱਚ ਗਵਾ ਦੇਵਾਂ

ਉਹ ਖ਼ਿਆਲਾਂ ਦੇ ਵਿੱਚ ਗੁਆਚੀ, ਵਾਲ ਮੇਰੇ ਵਾਹੁੰਦੀ ਹੋਣੀ ਆ

ਮੈਂ ਛੇਤੀ ਘਰ ਨੂੰ ਮੁੜ ਆਵਾਂ, ਮਾਂ ਇਹ ਚਾਹੁੰਦੀ ਹੋਣੀ ਆ

 

ਛੇਤੀ-ਛੇਤੀ ਸੈੱਟ ਹੋ ਕੇ ਰੱਬ ਦੇ ਸ਼ੁਕਰ ਮਨਾਉਣੇ ਨੇ

ਮੇਰੀ ਭੋਲੀ ਜਿਹੀ ਮਾਂ ਨੂੰ ਇਹ ਸੋਹਣੇ ਦੇਸ਼ ਦਿਖਾਉਣੇ ਨੇ

ਮਾਂ-ਪੁੱਤ ਦੇ ਵਿਛੋੜੇ ਵਾਲੇ ਗੀਤ ਉਹ ਗਾਉਂਦੀ ਹੋਣੀ ਆ

ਮੈਂ ਛੇਤੀ ਘਰ ਨੂੰ ਮੁੜ ਆਵਾਂ, ਮਾਂ ਇਹ ਚਾਹੁੰਦੀ ਹੋਣੀ ਆ