ਸਕੂਨ ਦਾ ਦਰਦ

ਜਤਿੰਦਰ ਦੀ ਮਾਂ ਉਸ ਨੂੰ ਬਹੁਤ ਪਿਆਰ ਕਰਦੀ ਆ ਭਾਵੇਂ ਜਤਿੰਦਰ ਦਾ ਪਿਤਾ ਉਸ ਦੇ ਛੋਟੇ ਹੁੰਦਿਆਂ ਹੀ ਉਹਨਾਂ ਨੂੰ ਛੱਡ ਗਿਆ ਸੀ । ਪਰ ਹੁਣ ਜਤਿੰਦਰ ਨੂੰ ਦੇਖ ਦੇਖ ਕਿ ਹੀ ਉਸ ਦੀ ਮਾਂ ਅਪਣੀ ਜਿੰਦਗੀ ਖੁਸ਼ੀ ਨਾਲ ਕੱਢ ਰਹੀ ਆ। ਉਹ ਬੁਹਤ ਖੁਸ਼ ਹੁੰਦੀ ਜਤਿੰਦਰ ਨੂੰ ਵੱਡੇ ਹੁੰਦਿਆਂ ਦੇਖ ਕੇ। ਅੱਜ ਜਤਿੰਦਰ ਦੇ ਸਕੂਲ ਵਿਚ ਖਾਸ ਪ੍ਰੋਗਰਾਮ ਹੈ ਜਿਸ ਵਿਚ ਮਾਂ ਬਾਰੇ ਦੱਸਿਆ ਜਾਣਾ ਤੇ ਬੱਚਿਆ ਨੂੰ ਮਾਂ ਦੁਆਰਾ ਕੀਤੇ ਜਾਂਦੇ ਬਲਿਦਾਨ ਤੇ ਬੱਚਿਆਂ ਲਈ ਸਹੇ ਜਾਂਦੇ ਦਰਦ ਵਾਰੇ ਵਿਚਾਰ ਅਤੇ ਆਪਣੇ ਅਨੁਭਵ ਪੇਸ਼ ਕਰਨ ਲਈ ਕਈ ਮਾਵਾਂ ਅਤੇ ਬੁੱਧੀਜੀਵੀਆਂ ਵੱਲੋਂ ਸ਼ਮੂਲੀਅਤ ਕੀਤੀ ਜਾਣੀ ਹੈ । 

ਜਤਿੰਦਰ ਨੂੰ ਉਸ ਦੀ ਮਾਂ ਨੇ ਵੜੇ ਪਿਆਰ ਨਾਲ ਤਿਆਰ ਕਰ ਸਕੂਲ ਭੇਜਿਆ। ਸਕੂਲ ਵਿਚ ਮਾਂ ਵਿਸ਼ੇ ਤੇ ਬਹੁਤ ਕੁੱਝ ਦੱਸਿਆ ਗਿਆ ਕਿ ਕਿਸ ਤਰਾਂ ਇਕ ਮਾਂ ਬੱਚੇ ਨੂੰ ਗਰਭ ਵਿਚ ਧਾਰਨ ਕਰਨ ਤੋਂ ਲੈ ਕਿ ਜਨਮ ਦੇਣ ਤੱਕ ਕਿਨੇ ਦਰਦ ਝੱਲਦੀ ਹੈ ਤੇ ਜਨਮ ਦੇਣ ਸਮੇਂ ਮਾਂ ਕਿੰਨਾ ਦਰਦ ਸਹਿਣ ਕਰਦੀ ਹੈ। ਇਹ ਸਭ ਜਤਿੰਦਰ ਨੂੰ ਹੈਰਾਨ ਕਰ ਰਿਹਾ ਸੀ ਤੇ ਉਸ ਦੇ ਮਨ ਵਿਚ ਮਾਂ ਪ੍ਰਤੀ ਪਿਆਰ ਨੂੰ ਵਧਾ ਰਿਹਾ ਸੀ ਤੇ ਕੁੱਝ ਸਵਾਲ ਸੀ ਜੋ ਉਹ ਆਪਣੀ ਮਾਂ ਤੋਂ ਪੁੱਛਣ ਲਈ ਬਹੁਤ ਕਾਹਲਾ ਸੀ ਜਿਵੇਂ ਹੀ ਉਹ ਸਕੂਲ ਤੋਂ ਘਰ ਆਇਆ ਤੇ ਜੋ ਸਕੂਲ ਵਿਚ ਸੁਣਿਆ ਬੜੀ ਹੈਰਾਨੀ ਨਾਲ ਮਾਂ ਨੂੰ ਦੱਸਣ ਲੱਗਾ। 

ਜਤਿੰਦਰ - ਮਾਂ ਅੱਜ ਸਕੂਲ ਵਿਚ ਸਾਨੂੰ ਮਾਂ ਬਾਰੇ ਬਹੁਤ ਕੁਝ ਦੱਸਿਆ ਗਿਆ। 
ਮਾਂ- ਕੀ ਦੱਸਿਆ ਪੁੱਤਰ ?
 
ਜਤਿੰਦਰ - ਇਹੀ ਕਿ ਮਾਂ ਆਪਣੀ ਔਲਾਦ ਲਈ ਕੀ ਕੀ ਕੁੱਝ ਕਰਦੀ ਆ। 
ਮਾਂ (ਪਿਆਰ ਨਾਲ)- ਕੀ ਕਰਦੀ ਆ ਮਾਂ ਔਲਾਦ ਲਈ ? 

ਜਤਿੰਦਰ - ਮਾਂ ਤੁਹਾਨੂੰ ਪਤਾ ਕਿ ਜਦੋਂ ਮਾਂ ਬੱਚੇ ਨੂੰ ਜਨਮ ਦਿੰਦੀ ਹੈ ਤਾਂ ਉਸ ਨੂੰ ਅਸਹਿ ਦਰਦ ਹੁੰਦਾ ਹੈ । ਕੀ ਤੁਹਾਨੂੰ ਵੀ ਹੋਇਆ ਸੀ ? 
ਮਾਂ- ਹਾਂ ਪੁੱਤਰ। 

ਜਤਿੰਦਰ - ਮਾਂ ਫਿਰ ਤੁਸੀਂ ਮੈਨੂੰ ਜਨਮ ਹੀ ਨਹੀਂ ਦੇਣਾ ਸੀ । 
ਮਾਂ- (ਅੱਖਾਂ ਵਿਚ ਹੰਝੂਆਂ ਨਾਲ) ਪੁੱਤਰ ਇਹ ਨਾ ਕਹਿ ਤੇਰੀ ਇਹ ਗੱਲ ਜਿਆਦਾ ਦਰਦ ਦੇ ਰਹੀ ਹੈ ਮੈਨੂੰ । ਇਕ ਔਰਤ ਲਈ ਬੱਚੇ ਨੂੰ ਜਨਮ ਦੇਣਾ ਇਕ ਅਨੰਦ ਹੈ। ਜੇਕਰ ਕੋਈ ਔਰਤ ਇਸ ਤੋਂ ਵਾਂਝੀ ਰਹਿ ਜਾਵੇ ਤਾਂ ਉਹ ਸਾਰਾ ਜੀਵਨ ਦੁੱਖ ਵਿਚ ਕੱਟ ਦੀ ਆ। 

(ਮਾਂ ਨੂੰ ਰੋਦਾਂ ਦੇਖ) ਜਤਿੰਦਰ - ਮਾਂ ਮੈਂ ਹੁਣ ਕਦੇ ਇਹ ਗੱਲ ਨਹੀਂ ਕਰਾਂਗਾ। 

ਮਾਂ- ਔਲਾਦ ਭਾਵੇਂ ਕਿਹੋ ਜਿਹੀ ਵੀ ਹੋਵੇ ਪਰ ਇੱਕ ਮਾਂ ਲਈ ਉਸ ਨੂੰ ਜਨਮ ਦੇਣ ਦਾ ਦਰਦ ਸਕੂਨ ਦਿੰਦਾ ਹੈ । ਮਾਂ ਨੇ ਜਤਿੰਦਰ ਦਾ ਮੂੰਹ ਦੁਲਾਰਿਆ ਤੇ ਜਤਿੰਦਰ ਦੌੜ ਗਿਆ। ਮਾਂ ਉਸ ਨੂੰ ਦੇਖ ਕਿ ਖੁਸ਼ ਹੋ ਰਹੀ ਸੀ ਤੇ ਸਾਰੇ ਦਰਦ ਭੁੱਲ ਗਈ।