ਬਾਗਾਂ ਦੇ ਵਿਚ ਫਿਰਨ ਸ਼ਿਕਾਰੀ, ਸਾਨੂੰ ਕੀ ।
ਰੁੱਖਾਂ ਨੂੰ ਪਈ ਵੱਢੇ ਆਰੀ, ਸਾਨੂੰ ਕੀ ।
ਜਿਹੜਾ ਤੱਕੜੀ ਫੜ ਕੇ ਵੰਡਣ ਬੈਠਾ ਸੀ,
ਬਾਂਦਰ ਵਾਂਗੂੰ ਖਾ ਗਿਆ ਸਾਰੀ, ਸਾਨੂੰ ਕੀ ।
ਏਥੇ ਰੋਜ਼ ਤਮਾਸ਼ੇ ਹੁੰਦੇ ਰਹਿੰਦੇ ਨੇ,
ਭਾਵੇਂ ਆਵੇ ਕੋਈ ਮਦਾਰੀ, ਸਾਨੂੰ ਕੀ ।
ਜਿਹੜੇ ਪੰਛੀ ਚਿਰ ਤੋਂ ਦੁੱਖੜੇ ਸਹਿੰਦੇ ਨੇ,
ਉੱਡ ਜਾਵਣ ਜੇ ਮਾਰ ਉਡਾਰੀ, ਸਾਨੂੰ ਕੀ ।
'ਸਾਨੂੰ ਕੀ' ਦਾ ਨਾਅਰਾ ਕੌਮੀ ਨਾਅਰਾ ਏ,
ਸਭਨਾਂ ਤੇ ਹੈ ਗਫ਼ਲਤ ਤਾਰੀ, ਸਾਨੂੰ ਕੀ ।
ਖੇਡ ਇਸ਼ਕ ਦੀ ਵਿੱਚੋਂ ਮੁੱਕ ਸਵਾਦ ਗਿਆ,
ਕਹਿੰਦੇ ਨੇ ਪਏ ਆਪ ਖਿਡਾਰੀ, ਸਾਨੂੰ ਕੀ ।
'ਆਸ਼ਿਕ' ਬਹੁਤੀ ਫ਼ਿਕਰਾਂ ਵਿਚ ਨਾ ਜਾਨ ਫਸਾ,
ਦੇਖਾਂਗੇ ਜਦ ਆਈ ਵਾਰੀ, ਸਾਨੂੰ ਕੀ ।
