ਗਾਚੀ ਦੇ ਗੁੰਬਦ, ਬੇਟ ਦੇ ਵਾਸੀ
ਮੂਸਲੀ-ਢਿੱਡ, ਦੈੜਾਂ ਦੀ ਚਰਬੀ
ਢਾਬ ਦੀ ਅੱਖ, ਰੋਹੀ ਦੇ ਸੁਰਮੇ
ਵਾਹਣਾਂ ਦੀ ਕੰਡ, ਬੂਈਂ ਦੇ ਬੋਦੇ
ਕਮਾਦੀ-ਢਾਣੀ, ਸੰਦਲੀ-ਠੇਕੇ।
ਭਾਦੋਂ ਦਾ ਗੁੱਸਾ, ਸਾਵਣੀ-ਝੱਲ
ਸੰਧੂਰੀ-ਜਜ਼ਬੇ, ਅਟਕ ਦੀ ਛੱਲ
ਮਿੱਟੀ-ਵਿਲਾਸ, ਪੌਣਾਂ ਦਾ ਸੂਣਾ
ਵੈਰੀ ਦਾ ਵਾਰ, ਚੁਰਾਹੇ-ਟੂਣਾ
ਵੇਲਾਂ ਦੇ ਵਲ਼, ਭੜ੍ਹੀਂ ਦੇ ਮੇਚੇ।
ਸ਼ਿਆਮ ਦੇ ਪੈਰ, ਮਿਰਗੀ-ਡੇਲੇ
ਅਰਸ਼ੀ ਥਲਾਂ ‘ਤੇ, ਕਿਰਨੀ-ਛਾਲੇ
ਚੰਨ-ਚਰਾਹਾ, ਰਿਸ਼ਮਾਂ ਨੂੰ ਚਾਰੇ
ਤਰਿਔਤੀ ਬੇਲਾ, ਡਲ਼ਕਾਂ ਮਾਰੇ
ਡੇਰੇ ਦੇ ਟੱਲ, ਲਿਸ਼ਕਦੇ-ਕੈਂਠੇ।
ਜੁਆਲ਼ਾ ਦੇ ਗਿੱਟੇ, ਸਲੇਟੀ-ਵੇਲਾਂ
ਤੋਪਾਂ ਦੇ ਗਲ਼, ਮੋਤੜੀ-ਮਾਲ਼ਾ
ਫ਼ਰਜ਼ੀ ਠੂਠੇ, ਗ਼ਰਜ਼ ਤੋ ਊਣੇ
ਕਪਾਹਾਂ ਦੇ ਆਸ਼ਕ, ਬਲੌਰੀ-ਤਾਰੇ
ਰਬਾਬੀ-ਟੁਣਕਾਂ, ਅਣੀਂ ਦੇ ਮੱਥੇ।
