ਭਾਵੇਂ ਉਹਦੇ ਮਗਰੋਂ ਸਾਡਾ, ਕਿੰਨਾ ਮੰਦਾ ਹਾਲ ਰਿਹਾ ।
ਪਰ ਇਹ ਹਸਰਤ ਤੇ ਨਹੀਂ ਕੋਈ, ਦੋ ਦਿਨ ਵੀ ਨਾ ਨਾਲ ਰਿਹਾ ।
ਜਦ ਵੀ ਕੋਈ ਵਿਛੜਣ ਵਾਲਾ, ਯਾਦ ਆਏ ਤੇ ਮੰਗੋ ਖ਼ੈਰ,
ਇਹ ਨਾ ਸੋਚੋ ਸਾਡੇ ਨਾਲ ਉਹ, ਘੜੀ ਰਿਹਾ ਕਿ ਸਾਲ ਰਿਹਾ ।
ਜੀਹਨੇਂ ਪਿਆਰ ਦਾ ਕੋਈ ਬੂਟਾ, ਧਰਤੀ ਉੱਤੇ ਲਾਇਆ ਨਹੀਂ,
ਦੌਲਤ ਵਾਲਾ ਹੋ ਕੇ ਵੀ ਉਹ, ਮੈਂ ਕਹਿਣਾ ਕੰਗਾਲ ਰਿਹਾ ।
ਹੋਰਾਂ ਲਈ ਆਜ਼ਾਦੀ ਦੀ ਗੱਲ, ਕਿਹੜੇ ਮੂੰਹ ਨਾਲ ਕਰਦਾ ਸੀ,
ਜਿਹੜਾ ਆਪਣੇ ਘਰਦਿਆਂ ਉੱਤੇ, ਨਿੱਤ ਵਿਛਾਉਂਦਾ ਜਾਲ ਰਿਹਾ ।
ਉਹ ਜੇ ਡੁੱਬ ਕੇ ਬਣੀ ਨਾ ਸੋਹਣੀ, ਉਹਨੂੰ ਮਿਹਣਾ ਦਈਏ ਕਿਉਂ,
ਇਸ਼ਕੇ ਦੇ ਦਰਿਆ ਵਿਚ'ਆਤਿਫ਼', ਤੂੰ ਵੀ ਕਦ ਮਹੀਵਾਲ ਰਿਹਾ ।
