ਬੁਲਾ ਲੈਂਦੀ ਮੈਂ ਖ਼ੁਦ ਵਾਪਸ ਅਗਰ ਤੂੰ ਰੁਕ ਗਿਆ ਹੁੰਦਾ।
ਤੇਰੇ ਕਦਮਾਂ 'ਚ ਆ ਜਾਂਦੀ ਜੇ ਥੋੜਾ ਝੁਕ ਗਿਆ ਹੁੰਦਾ।
ਅਗਰ ਤੂੰ ਹਾਦਸੇ ਦੇਂਦਾ ਨਾ ਏਨੇ ਜ਼ਿੰਦਗਾਨੀ ਨੂੰ
ਤਾਂ ਸਾਰਾ ਸਿਲਸਿਲਾ ਹੀ ਸ਼ਾਇਰੀ ਦਾ ਮੁਕ ਗਿਆ ਹੁੰਦਾ ।
ਨਿਸ਼ਾਨਾ ਲਾ ਕੇ ਪੰਛੀ 'ਤੇ ਬੜਾ ਮਾਯੂਸ ਹੋਇਆ ਉਹ
ਮੇਰੇ ਮੌਲ਼ਾ ਨਿਸ਼ਾਨਾ ਓਸ ਦਾ ਹੀ ਉਕ ਗਿਆ ਹੁੰਦਾ ।
ਸਿਤਾਰੇ ਜੇ ਮੇਰੀ ਕਿਸਮਤ ਦੇ ਗਰਦਿਸ਼ ਵਿੱਚ ਨਾ ਹੁੰਦੇ
ਸਮੁੰਦਰ ਆਸ ਦਾ ਵਹਿੰਦਾ ਨਾ ਏਦਾਂ ਸੁੱਕ ਗਿਆ ਹੁੰਦਾ ।
ਤੇਰੀ ਆਮਦ 'ਤੇ ਮਨ ਮੰਦਿਰ ਦੇ ਸਾਰੇ ਦੀਪ ਜਗ ਪੈਂਦੇ
ਸੁਮੈਰਾ 'ਨੇਰ ਤੇਰੀ ਰੋਸ਼ਨੀ ਵਿਚ ਲੁਕ ਗਿਆ ਹੁੰਦਾ ।
