ਛੁੱਟੀ ਹੈ ਜੀ ਛੁੱਟੀ-
ਅੱਜ ਵਾਹਵਾ ਐਤਵਾਰ ਨੂੰ।
ਚੱਲ ਮੇਰੇ ਘੋੜੇ-
ਚੱਲ ਚੱਲੀਏ ਬਾਜ਼ਾਰ ਨੂੰ।
ਬੜਾ ਸੁਹਣਾ ਲੱਗਦਾ ਏਂ,
ਜਦੋਂ ਏਂ ਤੂੰ ਭੱਜਦਾ।
ਤੇਰੇ ਉੱਤੇ ਬੈਠ-ਬੈਠ,
ਮੈਂ ਨਹੀਉਂ ਰੱਜਦਾ।
ਛੱਡ ਜਾਵੇਂ ਪਿੱਛੇ-
ਸਾਰੇ ਘੋੜਿਆਂ ਦੀ ਧਾੜ ਨੂੰ,
ਚੱਲ ਮੇਰੇ ਘੋੜੇ…………!
ਜਾ ਕੇ ਬਾਜ਼ਾਰ-
ਤੈਨੂੰ ਚੀਜੀਆਂ ਖਵਾਊਂਗਾ।
ਨਵੇਂ ਹੀ ਨਜ਼ਾਰੇ-
ਤੈਨੂੰ ਉੱਥੇ ਮੈ ਦਿਖਾਊਂਗਾ।
ਤੈਨੂੰ ਮੈਂ ਵਿਖਾਊਂ-
ਉੱਥੇ ਕਾਰਾਂ ਦੀ ਕਤਾਰ ਨੂੰ,
ਚੱਲ ਮੇਰੇ ਘੋੜੇ…………!
ਨਵੀਂ ਤਾਜੀ ਖਬਰ ਕੋਈ,
ਪੜ੍ਹ ਕੇ ਸੁਣਾਵਾਂਗਾ।
ਤੇਰੇ ਉੱਤੇ ਬੈਠ ਕੇ ਮੈਂ
ਗੀਤ ਮਿੱਠੇ ਗਾਵਾਂਗਾ।
ਜਾ ਕੇ ਸਟਾਲ ਤੋਂ-
ਖਰੀਦੂੰ ਅਖ਼ਬਾਰ ਨੂੰ,
ਚੱਲ ਮੇਰੇ ਘੋੜੇ…………!
ਚੱਲ ਮੇਰੇ ਘੋੜਿਆ ਵੇ,
ਮੇਰਿਆ ਖਿਡਾਉਣਿਆਂ।
ਮੰਮੀ ਲੈ ਕੇ ਆਈ ਸੀ
ਬਾਜ਼ਾਰੋਂ ਤੈਨੂੰ ਸੁਹਣਿਆਂ।
ਖੁਸ਼ ਹੋਵਾਂ ਵੇਖ ਤੇਰੇ-
ਰੂਪ ਤੇ ਅਕਾਰ ਨੂੰ,
ਚੱਲ ਮੇਰੇ ਘੋੜੇ…………!
ਮਿੱਤਰਾਂ ਦੀ ਢਾਣੀ ਵਿੱਚ,
ਤੈਨੂੰ ਮੈਂ ਵਿਖਾਵਾਂਗਾ।
ਤੇਰੇ ਉੱਤੋਂ ਪਿਆਰਿਆ ਮੈਂ,
ਵਾਰੀ-ਵਾਰੀ ਜਾਵਾਂਗਾ।
ਸਾਰੇ 'ਕੱਠੇ ਹੋ ਕੇ ਆਪਾਂ-
ਮਾਣਾਂਗੇ ਪਿਆਰ ਨੂੰ,
ਚੱਲ ਮੇਰੇ ਘੋੜੇ…………!
