ਸ਼ੋਰ-ਸ਼ਰਾਬਾ ਕਰਦੇ ਬੱਚੇ।
ਯਾਰੋ ਸਾਡੇ ਘਰਦੇ ਬੱਚੇ।
ਦਿਲ ਦੇ ਸੁੱਚੇ-ਮਨ ਦੇ ਸੱਚੇ,
ਸੱਚੀਆਂ ਗੱਲਾਂ ਕਰਦੇ ਨੇ।
ਪਾਪਾ ਕੋਲੋਂ ਡਰਦੇ ਨੇ ਪਰ-
ਮੰਮੀ ਤੋਂ ਨਾ ਡਰਦੇ ਬੱਚੇ।
ਸਿਖਰ ਦੁਪਹਿਰੇ ਸੂਏ 'ਤੇ ਜਾ,
ਪਾਣੀ ਦੇ ਵਿੱਚ ਤਰਦੇ ਬੱਚੇ।
ਦਬਕਾ ਮਾਰੇ ਤੋਂ ਇਹ ਝੱਟ-ਪੱਟ,
ਅੱਖੀਂ ਹੰਝੂ ਭਰਦੇ ਬੱਚੇ।
ਗਲੀਆਂ ਵਿੱਚੋਂ ਚੁਗਦੇ ਕਾਗਜ਼,
ਕਈ ਬਹੁ ਘੱਟ ਉਮਰ ਦੇ ਬੱਚੇ।
ਖੇਤਾਂ ਵਿੱਚ ਜਾ ਰੁੱਖਾਂ ਉੱਤੇ,
ਚੜ੍ਹਦੇ ਕਦੇ ਉੱਤਰਦੇ ਬੱਚੇ।
ਆਲੇ ਭੋਲੇ ਇਹ ਮਾਵਾਂ ਨੂੰ,
ਚਿੱਤੋਂ ਨਹੀਂ ਵਿਸਰਦੇ ਬੱਚੇ।
ਕਦੇ ਕਦਾਈਂ ਤੂੰ-ਮੈਂ ਕਰਕੇ,
ਆਪਸ ਵਿੱਚ ਟੱਕਰਦੇ ਬੱਚੇ।
ਜਾ ਸਕੂਲੇ ਅੰਮ੍ਰਿਤ ਵੇਲੇ,
ਚੰਗੇ ਸ਼ਬਦ ਉੱਚਰਦੇ ਬੱਚੇ।
ਰੰਗਾਂ ਦੇ ਸੰਗ ਖੇਡ-ਖੇਡ ਵਿੱਚ,
ਵਧੀਆ ਚਿਤਰ, ਚਿਤਰਦੇ ਬੱਚੇ।
