'ਟੁਕ-ਟੁਕ' ਕਰਦੀ ਬੇ-ਹਿਸਾਬ।
ਹੈ ਇੱਕ ਚੂਹੀ ਬੜੀ ਖਰਾਬ।
ਬੜੀ ਖਰਾਬੀ ਕਰਦੀ ਹੈ ਇਹ।
ਕਿਸੇ ਕੋਲੋਂ ਨਾ ਡਰਦੀ ਹੈ ਇਹ।
ਟੱਪੂੰ-ਟੱਪੂੰ ਕਰਦੀ ਰਹਿੰਦੀ।
ਇੱਕ ਪਲ ਵੀ ਨਾ ਟਿਕ ਕੇ ਬਹਿੰਦੀ।
ਚੜ੍ਹ ਜਾਂਦੀ ਪਰਛੱਤੀ ਉੱਤੇ।
ਉੱਤੋਂ ਸਭ ਕੁਝ ਟੁੱਕ ਕੇ ਸੁੱਟੇ।
ਕੱਪੜੇ-ਲੀੜੇ ਟੁਕਦੀ ਰਹਿੰਦੀ।
ਫਿਰ ਵੀ ਇਹਦੀ ਭੁੱਖ ਨਾ ਲਹਿੰਦੀ।
ਸਾਰਾ ਦਿਨ ਇਹ ਰਹਿੰਦੀ ਚਰਦੀ।
ਅਖਬਾਰਾਂ ਦਾ ਕੁਤਰਾ ਕਰਦੀ।
ਨਵੀਆਂ ਕਰੇ ਖਰਾਬ ਕਿਤਾਬਾਂ।
ਲੈ ਜਾਵੇ ਬੂਟਾਂ 'ਚੋਂ ਜੁਰਾਬਾਂ।
ਵਿੱਚ ਰਸੋਈ ਜਾ ਕੇ ਵੜ ਜਾਏ।
ਸਬਜੀ-ਭਾਜੀ ਜੂਠੀ ਕਰ ਜਾਏ।
ਸੰਗ-ਸ਼ਰਮ ਨਾ ਰੱਤੀ ਕਰਦੀ।
ਮੰਦੇ ਕੰਮ ਕੁਪੱਤੀ ਕਰਦੀ।
ਨਿਰੀ ਚੁੜੇਲ ਹੈ ਚੂਹੀ ਸਾਡੀ।
ਚਹੁੰ ਪਾਸੀਂ ਕਰਦੀ ਬਰਬਾਦੀ।
ਬੂਹੇ ਕੋਲ ਟਰੰਕਾਂ ਪਿੱਛੇ।
ਲੁਕ ਕੇ ਬੈਠੀ ਨਾ ਇਹ ਦਿਸੇ।
ਆਵੇ ਕਿਤੇ ਅੜਿੱਕੇ ਸਾਡੇ।
ਛੱਡ ਕੇ ਆਈਏ ਦੂਰ ਦੁਰਾਡੇ।
ਜਿਸ ਦਿਨ ਇਹਨੂੰ ਫਾਹ ਲੈਣਾ ਹੈ।
ਇਹਨੂੰ ਸਬਕ ਸਿਖਾ ਦੇਣਾ ਹੈ।
ਰੋਟੀ ਦੀ ਇੱਕ ਬੁਰਕੀ ਪਾ ਕੇ।
ਫੜ੍ਹਨੀ ਅਸੀਂ ਕੜਿੱਕੀ ਲਾ ਕੇ।
ਘਰ ਸਾਡਾ ਭਰਪੂਰ ਹੀ ਰੱਖੀਂ।
ਰੱਬਾ ਚੂਹੀ ਦੂਰ ਹੀ ਰੱਖੀਂ।
