ਕਿਣ-ਮਿਣ, ਕਿਣ-ਮਿਣ
ਵੱਸਣ ਕਣੀਆਂ!
ਡਿਗਦੀਆਂ-ਡਿਗਦੀਆਂ
ਹੱਸਣ ਕਣੀਆਂ!
ਬਿਜਲੀ ਚਮਕੇ ਬੱਦਲ ਗੱਜਣ।
'ਵਾ ਦੇ ਝੋਕੇ ਫਰ-ਫਰ ਵੱਜਣ।
ਸਾਵਣ ਆਇਆ-
ਦੱਸਣ ਕਣੀਆਂ!!!
ਬੱਚੇ ਕਣੀਆਂ ਵਿੱਚ ਨਹਾਉਂਦੇ।
ਉਮਲ੍ਹ-ਉਮਲ੍ਹਕੇ ਸ਼ੋਰ ਮਚਾਉਂਦੇ।
ਜਦ ਪਿੰਡਿਆਂ 'ਤੇ-
ਵੱਜਣ ਕਣੀਆਂ!!!
ਕੋਇਲਾਂ ਮਿੱਠੇ ਗੀਤ ਸੁਣਾਵਣ।
ਮੋਰ ਵੀ ਭੰਗੜੇ ਪੈਲ੍ਹਾਂ ਪਾਵਣ।
ਵੇਖ ਕੇ ਡੱਡੂ-
ਨੱਚਣ ਕਣੀਆਂ!!!
ਗਰਮੀ ਦੀ ਹੈ ਵਾਰੀ ਪੁੱਗੀ।
ਚਹੁੰ ਪਾਸੀਂ ਹਰਿਆਲੀ ਉੱਗੀ।
ਸਭ ਨੂੰ ਚੰਗੀਆਂ
ਲੱਗਣ ਕਣੀਆਂ!!!
'ਵਾ ਵੀ ਮਿੱਠੇ ਗੀਤ ਅਲਾਪੇ।
ਹਰਿਆਲੀ ਵੀ ਧੋਤੀ ਜਾਪੇ।
ਅਸਰ ਆਪਣਾ-
ਦੱਸਣ ਕਣੀਆਂ!!!
