ਲਹੂ ਦੇ ਦੀਪ ਬਾਲੋ ਹੁਣ ਹਨੇਰਾ ਬਹੁਤ ਗਹਿਰਾ ਹੈ।
ਕਿ ਖ਼ਾਬਾਂ ਨੂੰ ਸੰਭਾਲੋ ਹੁਣ ਹਨੇਰਾ ਬਹੁਤ ਗਹਿਰਾ ਹੈ ।
ਜਿਹਨਾਂ ਨੇ ਸੀਸ ਵਾਰੇ ਨੇ ਉਨਾਂ ਨੂੰ ਭੁੱਲ ਨਾ ਜਾਣਾ
ਐ ਮੇਰੇ ਹਮ ਖਿਆਲੋ ਹੁਣ ਹਨੇਰਾ ਬਹੁਤ ਗਹਿਰਾ ਹੈ ।
ਕਰੋ ਹੁਣ ਆਪਣੇ ਮਸਤਕ 'ਚੋਂ ਰੌਸ਼ਨ ਚੰਨ ਤੇ ਤਾਰੇ
ਕੋਈ ਸੂਰਜ ਵੀ ਭਾਲੋ ਹੁਣ ਹਨੇਰਾ ਬਹੁਤ ਗਹਿਰਾ ਹੈ ।
ਸਦਾ ਹੀ ਟਿਮਟਿਮਾਉਂਦੇ ਨੇ ਇਹ ਜੁਗਨੂੰ ਨੇਰਿਆਂ ਅੰਦਰ
ਕਿ ਜਾਗੋ ਐ ਮਸ਼ਾਲੋ ਹੁਣ ਹਨੇਰਾ ਬਹੁਤ ਗਹਿਰਾ ਹੈ ।
ਜਮੀਰਾਂ ਵਾਲਿਓ ਸ਼ਮਸ਼ੀਰ ਚੁੱਕਣ ਦਾ ਇਹੀ ਵੇਲਾ,
ਜ਼ਗਾ ਗੈਰਤ ਉਠਾਲ਼ੋ ਹੁਣ ਹਨੇਰਾ ਬਹੁਤ ਗਹਿਰਾ ਹੈ ।
