ਪਾਥੀਆ, ਲੱਕੜਾਂ, ਕਾਨੇ ਲਾ ਕੇ,
ਅਸਾਂ ਬਣਾਈ ਲੋਹੜੀ ਆ!
ਲੋਹੜੀ ਆ ਬਈ ਲੋਹੜੀ ਆ,
ਕਰਮਾਂ ਵਾਲੀ ਲੋਹੜੀ ਆ!!
'ਕੱਠੇ ਬਹਿ ਕੇ ਸੇਕਾਂਗੇ।
ਅੱਗ ਬਲਦੀ ਨੂੰ ਵੇਖਾਂਗੇ।
ਮੂੰਗਫਲੀ ਵੀ ਖਾਵਾਂਗੇ।
ਰਿਉੜੀਆਂ ਖੂਬ ਚਬਾਵਾਂਗੇ।
ਗੁੜ ਦੀ ਗੱਚਕ ਚੱਬਾਂਗੇ।
ਨਾਲ ਚਿਰਵੜੇ ਲੱਭਾਂਗੇ।
ਤਿਲ ਲੋਹੜੀ ਵਿੱਚ ਪਾਵਾਂਗੇ।
ਅੱਗ ਨੂੰ ਹੋਰ ਮਘਾਵਾਂਗੇ।
ਨੱਚਾਂਗੇ ਤੇ ਗਾਵਾਂਗੇ।
ਸੁਸਤੀ ਦੂਰ ਭਜਾਵਾਂਗੇ।
ਇੱਕ-ਦੂਜੇ ਨੂੰ ਵੇਖਾਂਗੇ।
'ਕੱਠੇ ਬਹਿ ਕੇ ਸੇਕਾਂਗੇ।
ਆਈ ਵਹੁਟੀ ਮੰਗੂ ਦੀ।
ਗੁੜ ਉਹਦੀ ਮਾਂ ਵੰਡੂਗੀ।
ਮੁੰਡਾ ਜੰਮਿਆਂ ਭੰਬੀ ਦਾ।
ਦੇਖੋ ਕੀ ਕੁਝ ਵੰਡੀਦਾ।
ਭੰਬੀ ਭੰਗੜਾ ਪਾਉਂਦੀ ਆ।
ਚੰਦੂ ਦੀ ਮਾਂ ਗਾਉਂਦੀ ਆ।
ਲੱਭੂ ਦੀ ਮਾਂ ਬੋੜੀ ਵੀ।
ਗਾਈ ਜਾਂਦੀ ਘੋੜੀ ਜੀ।
ਸ਼ਾਮੋਂ ਮਾਈ ਘੁੱਲੇ ਦੀ।
ਵੰਡੀ ਜਾਂਦੀ ਫੁੱਲੇ ਹੀ।
ਗੀਤ ਖੁਸ਼ੀ ਦੇ ਗਾਵਾਂਗੇ।
ਜਾਤੀ ਭੇਦ ਮਿਟਾਵਾਂਗੇ।
ਰਲਕੇ ਹਿੰਦੂ-ਮੁਸਲਿਮ-ਸਿੱਖ।
ਹੋ ਜਾਵਾਂਗੇ ਸਾਰੇ ਇੱਕ।
ਨੂਰਾਂ ਜੀਤੋ ਭੋਲੀ ਵੀ।
ਹੈ ਮੁੰਡਿਆਂ ਦੀ ਟੋਲੀ ਵੀ।
ਸਾਰੇ ਰਲਕੇ ਗਾਵਾਂਗੇ।
ਹੱਸਾਂਗੇ-ਹਸਾਵਾਂਗੇ।
ਲੋਹੜੀ ਖੂਬ ਮਨਾਵਾਂਗੇ।
ਬੋਲੀਆਂ ਭੰਗੜੇ ਪਾਵਾਂਗੇ।
ਸੁਣ-ਸੁਣ ਸਾਡੀਆਂ ਬੋਲੀਆਂ ਨੂੰ।
ਤੱਕ ਭੰਗੜੇ ਦੀਆਂ ਟੋਲੀਆਂ ਨੂੰ।
ਯਾਰਾਂ ਸੰਗ ਮਸਤੀ ਵਿੱਚ ਆ।
ਦਿੱਤੀ ਕਵਿਤਾ ਖੂਬ ਬਣਾ।
ਲੋਹੜੀ ਆ ਬਈ ਲੋਹੜੀ ਆਂ!
ਕਰਮਾਂ ਵਾਲੀ ਲੋਹੜੀ ਆ!!
