ਭੀਂ-ਭੀਂ ਕਰਦਾ ਆਵੇ ਮੱਛਰ।
ਜ਼ਾਲਮ ਡੰਗ ਚਲਾਵੇ ਮੱਛਰ।
ਰਾਤੀ ਸਾਨੂੰ ਸੌਣ ਨਾ ਦੇਵੇ,
ਤੋੜ-ਤੋੜ ਕੇ ਖਾਵੇ ਮੱਛਰ।
ਅੱਲਾ ਜੀ ਨੇ ਖੂਬ ਬਣਾਇਆ,
ਲੋਕਾਂ ਤਾਈਂ ਸਤਾਵੇ ਮੱਛਰ।
ਮੱਛਰ ਦੀ ਕੀ ਜੂਨ ਭਲਾ ਹੈ!
ਧੁੱਪਾਂ ਵਿੱਚ ਮਰ ਜਾਵੇ ਮੱਛਰ।
ਸਾਰੇ ਇਸ ਨੂੰ ਕੋਹੜੀ ਕਹਿੰਦੇ,
ਸਭ ਤੋਂ ਗਾਹਲਾਂ ਖਾਵੇ ਮੱਛਰ।
ਕੰਨ ਕੋਲ ਆ ਕਰੇ ਮਸ਼ਕਰੀ,
ਮਸ਼ਕਕੀਟ ਕਹਿਲਾਵੇ ਮੱਛਰ।
ਡੰਗ ਏਸ ਦਾ ਬਹੁਤ ਵਿਸ਼ੈਲਾ,
ਤਾਹੀਉਂ ਤਾਪ ਚੜ੍ਹਾਵੇ ਮੱਛਰ।
ਮੱਛਰ ਮਾਰ ਦਵਾਈਆਂ ਉੱਤੇ,
ਖਰਚਾ ਖੂਬ ਕਰਾਵੇ ਮੱਛਰ।
ਰਾਤ ਲਗਾਈ ਗੁੱਡ-ਨਾਈਟ ਨੂੰ,
ਝਾਤ ਆਖ ਮੁੜ ਜਾਵੇ ਮੱਛਰ।
ਇਸ ਬੇਸ਼ਰਮ ਤੋਂ ਬਚੋ ਹਮੇਸ਼ਾ,
ਰੱਤੀ ਸ਼ਰਮ ਨਾ ਖਾਵੇ ਮੱਛਰ।
ਡੰਗ ਚਲਾ ਕੇ ਉੱਡ ਜਾਂਦਾ ਹੈ,
ਕਾਬੂ ਵਿੱਚ ਨਾ ਆਵੇ ਮੱਛਰ।
ਰਹਿਣਾ ਇਸ ਤੋਂ ਦੂਰ ਭਰਾਵੋ,
ਕਿਧਰੇ ਕੱਟ ਨਾ ਜਾਵੇ ਮੱਛਰ।
