ਮੈਂ ਚਾਹੁੰਦਾ ਹਾਂ ਦੇਸ਼ ਮੇਰੇ ਵਿੱਚ,
ਛਣ-ਛਣ ਕਰਕੇ ਛਣਕਣ ਹਾਸੇ।
ਖੁਸ਼ੀਆਂ ਨੱਚਣ ਚਾਰੇ ਪਾਸੇ।
ਮੇਰਾ ਸੁਹਣਾ ਦੇਸ਼ ਪਿਆਰਾ।
ਚਮਕੇ ਬਣਕੇ ਅੰਬਰ ਤਾਰਾ।
ਵੈਰ-ਵਿਰੋਧ ਨਾ ਉੱਕਾ ਹੋਵੇ।
ਨਫ਼ਰਤ ਦਾ ਬੀ ਮੁੱਕਾ ਹੋਵੇ।
ਨਾ ਹੋਵੇ ਧਰਮਾਂ ਦੀ ਆੜ।
ਜੋ ਦਿੰਦੀ ਮਨੁੱਖਤਾ ਨੂੰ ਪਾੜ।
ਦੇਸ਼ ਮੇਰੇ ਦੇ ਨੰਨ੍ਹੇ ਬਾਲ।
ਨਾ ਵਿਲਕਣ ਭੁੱਖ-ਦੁੱਖ ਦੇ ਨਾਲ।
ਨਾ ਹੋਵੇ ਕੋਈ ਐੇਟਮ ਬੰਬ।
ਜਿਸ ਤੋਂ ਜਾਂਦੀ ਦੁਨੀਆਂ ਕੰਬ।
ਅਮਨ ਦਾ ਹੋਵੇ ਇੱਥੇ ਰਾਜ।
ਮੁੱਕ ਜਾਵਣ ਸਾਰੇ ਜੰਗਬਾਜ਼।
ਨਾ ਕੋਈ ਇੱਥੇ ਲੋਟੂ ਵੱਸੇ।
ਨਾ ਦੁਨੀਆਂ ਨੂੰ ਲੁਟ-ਲੁਟ ਹੱਸੇ।
ਕਿਰਤੀ ਕਾਮੇ ਸਾਰੇ ਹੋਵਣ।
ਇੱਕ-ਦੂਜੇ ਨੂੰ ਪਿਆਰੇ ਹੋਵਣ।
ਪਿਆਰ ਪਸਰ ਜਾਏ ਚਹੁੰ ਪਾਸੇ।
ਛਣ-ਛਣ ਕਰਕੇ ਛਣਕਣ ਹਾਸੇ।
ਮੈਂ ਚਾਹੁੰਦਾ ਹਾਂ ਦੇਸ਼ ਮੇਰੇ ਵਿੱਚ,
ਹੋਣ ਨਾ ਲੋਕੀਂ ਕਦੇ ਉਦਾਸੇ!
ਖੁਸ਼ੀਆਂ ਨੱਚਣ ਚਾਰੇ ਪਾਸੇ।
