ਮਜਬੂਰਾਂ ਦੇ ਭਾਰ ਵੰਡਾਵੇਗਾ ਕਿਹੜਾ ।
ਪਿਆਰਾਂ ਦੇ ਗੁਲਜ਼ਾਰ ਖਿੜਾਵੇਗਾ ਕਿਹੜਾ ।
ਦੁੱਖਾਂ ਦੇ ਦੀਪਕ ਨੇ ਅੱਗਾਂ ਲਾਈਆਂ ਨੇ,
ਸੁੱਖਾਂ ਦਾ ਮਲਹਾਰ ਵਜਾਵੇਗਾ ਕਿਹੜਾ ।
ਸੋਚ ਰਿਹਾ ਹਾਂ ਹੱਕ ਦੀ ਖ਼ਾਤਰ ਮੇਰੇ ਬਾਅਦ,
ਜੁੱਸੇ ਨੂੰ ਸੰਗਸਾਰ ਬਣਾਵੇਗਾ ਕਿਹੜਾ ।
ਲੁੱਟੀ ਹੋਈ ਧੀ 'ਮਰੀਅਮ' ਦੀ ਪੁੱਛਦੀ ਏ,
ਹੁਸਨ ਦਾ ਇਹ ਬਾਜ਼ਾਰ ਮੁਕਾਵੇਗਾ ਕਿਹੜਾ ।
ਮੋਹ-ਮਾਇਆ ਦੇ ਮੇਲੇ ਵਿਚ ਅਖ਼ਲਾਸਾਂ ਨੂੰ,
ਆਪਣੇ ਗਲ ਦਾ ਹਾਰ ਬਣਾਵੇਗਾ ਕਿਹੜਾ ।
ਪੱਥਰ ਖਾ ਕੇ ਵੀ ਨਹੀਂ ਰੁੱਸਿਆ ਯਾਰਾਂ ਨਾਲ,
'ਸ਼ਾਮੀ' ਮੇਰੇ ਆਰ ਨਿਭਾਵੇਗਾ ਕਿਹੜਾ ।
