ਮਾਂਝੀ ਕਿਸ਼ਤੀ ਉੱਥੇ ਲੈ ਚੱਲ,
ਜਿੱਥੇ ਬਹੁਤ ਡੁੰਘਾਈ ਏ।
ਲਹਿਰਾਂ ਦਾ ਹੀ ਜੋਰ ਵੇਖਣਾ,
ਦਿਲ ਵਿੱਚ ਸਾਡੇ ਆਈ ਏ।।
ਐ ਸਾਗਰ ਤੂੰ ਹੋ ਵਡੇਰਾ,
ਜੇਰਾ ਘੱਟ ਨਹੀਂ ਸਾਡਾ ਵੀ।
ਲਹਿਰਾਂ ਨੂੰ ਤੂੰ ਦੇ ਰਵਾਨੀ,
ਸਾਨੂੰ ਡਰ ਨਹੀਂ ਰਾਈ ਏ।।
ਲਹਿਰੋ ਵੱਡੀਆਂ ਹੋ ਹੋ ਆਵੋ,
ਅਸੀਂ ਵੀ ਹਾਂ ਤਿਆਰ ਖੜ੍ਹੇ ।
ਪਿੱਛਾ ਦੇਈਏ,ਪਿੱਛੇ ਹੱਟੀਏ,
ਫਿਰ ਕਹਿਣਾ ਰੁਸਵਾਈ ਏ।।
ਪਿੱਛੇ ਪਰਤਨਾ ਮਰਨ ਜਿਹਾ,
ਤੇ ਡੱਟ ਜਾਣਾ- ਸੂਰਜ ਹੋਣਾ।
ਇੱਹੋ ਇਸ਼ਕ ਅਕੀਦੇ ਦੀ ਗੱਲ
ਮੁਰਸ਼ਦ ਨੇਂ ਸਮਝਾਈ ਏ।।
ਜਿਸਨੇ ਉਗਣਾ ਉੱਗ ਆਵੇਗਾ
'ਸਿੱਧੂਆ'-ਪਥਰ ਦੇ ਸੀਨੇ ਚੌਂ।
ਰੋਕਾਂ ਟੋਕਾਂ ਲਾਉਣੀਆਂ ਲੋਕਾਂ
ਰੀਤ ਹੀ ਚਲਦੀ ਆਈ ਏ।।
