ਮੇਰੀ ਮੈਂ ਤੇ ਦੂਰ ਦੀ ਗੱਲ ਏ ਮੈਂ ਨਾ ਨਜ਼ਰੀ ਆਵਾਂ ।
ਤੇਰੇ ਨੈਣਾਂ ਥੀਂ ਜੇ ਆਪਣੇ ਅੰਦਰ ਝਾਤੀ ਪਾਵਾਂ ।
ਦਰਦਾਂ ਦੀ ਬੇਸੁਰਤੀ ਨੇ ਨਈਂ ਸੁਰਤ ਸੰਭਾਲਣ ਦਿੱਤੀ,
ਜੀਅ ਤੇ ਮੇਰਾ ਵੀ ਕਰਦਾ ਏ ਮਾਹੀਏ ਢੋਲੇ ਗਾਵਾਂ ।
ਉੱਥੋਂ ਆਇਆ ਐਥੇ ਦੇ ਲਈ ਐਥੇ ਵੀ ਨਹੀਂ ਰਹਿਣਾ,
ਕਿਹੜਾ ਦੇਸ ਏ ਬੰਦੇ ਦਾ ਦਏ ਕਿੱਥੋਂ ਦਾ ਸਿਰਨਾਵਾਂ ।
ਜਿਸ ਦਮ ਸੂਰਜ ਸਿਰ ਤੇ ਆਇਆ ਆਣ ਬਣੇਗੀ ਸਿਰ ਤੇ,
ਛਾਹ ਵੇਲੇ ਪਿਆ ਲੱਭਦਾ ਫਿਰਦਾ ਤੇਰਾ ਮੁਸਾਫ਼ਿਰ ਛਾਵਾਂ ।
ਥੱਕੇ ਟੁੱਟੇ ਜੁੱਸੇ ਲਈ ਏ ਛੇਕੜਲਾ ਇਹ ਟੋਇਆ,
ਆਪੇ ਕਬਰੇ ਪੈ ਜਾਵਾਂ ਯਾ ਸੱਧਰਾਂ ਨੂੰ ਦਫ਼ਨਾਵਾਂ ।
ਬਾਜ਼ ਨਾ ਆਵੇ ਰੋਜ਼ ਈ ਜਾਵੇ ਲੱਭੇ ਵਿਚ ਬਾਜ਼ਾਰਾਂ,
ਤੂੰ ਤੇ 'ਹੱਟ' ਹਟਾ ਲਈ ਉੱਥੋਂ ਦਿਲ ਨੂੰ ਕਿਵੇਂ ਹਟਾਵਾਂ ।
ਵੇਲੇ ਦੇ 'ਸੁਲਤਾਨ' ਕਿਸੇ ਨੇ ਗੱਡੀ ਹੋਈ ਏ ਸੂਲੀ,
ਜਿੰਦੇ ਆ ਮਨਸੂਰ ਦੇ ਵਾਂਗੂੰ ਮੈਂ ਕੋਈ ਚੰਨ ਚੜ੍ਹਾਵਾਂ ।
