ਮੋਮਬੱਤੀਆਂ ਜਗਦੀਆਂ
ਲੋਅ ਦਿੰਦੀਆਂ
ਜਲ਼ ਕੇ ਢਲ਼ਦੀਆਂ
ਮੁੱਕ ਜਾਂਦੀਆਂ !
ਮੋਮਬੱਤੀਆਂ -
ਛੋਟੀਆਂ, ਵੱਡੀਆਂ
ਲੰਮੀਆਂ, ਮੱਧਰੀਆਂ
ਮੋਟੀਆਂ, ਪਤਲੀਆਂ
ਜਲ਼ਣ ਲਈ ਬਣਦੀਆਂ !
ਕੁਝ ਖ਼ੂਸ਼ਬੂਦਾਰ
ਮਹਿਕ ਵੰਡਦੀਆਂ
ਆਪਾ ਵਾਰਦੀਆਂ
ਮੁੱਕ ਜਾਂਦੀਆਂ !
ਕੁਝ ਘਰ ਦੇ ਡਰਾਇੰਗ ਰੂਮ 'ਚ
ਸਜੀਆਂ ਰਹਿੰਦੀਆਂ, ਸਾਲਾਂ ਬੱਧੀ
ਇੰਤਜ਼ਾਰ ਕਰਨ ਨੂੰ ਬਣਦੀਆਂ !
ਕੁਝ ਜਲ਼ਦੀਆਂ ਕਿਸੇ ਦਰਗਾਹ 'ਤੇ
ਜਾਂ ਕਿਸੇ ਮਜ਼ਾਰ 'ਤੇ
ਕੁਝ ਮੈਲ਼ੀਆਂ ਹੋ ਜਾਂਦੀਆਂ
ਪਈਆਂ ਗ਼ੈਰਾਂ ਦੀ ਪਨਾਹ 'ਚ !
ਕੁਝ ਮੋਮਬੱਤੀਆਂ ਆਪ ਤਾਂ ਜਲ਼ਦੀਆਂ
ਘਰ ਵੀ ਜਲ਼ਾ ਦਿੰਦੀਆਂ!
ਮੋਮਬੱਤੀ ਦਾ ਧਰਮ ਜਲ਼ਣਾ !
ਮੋਮਬੱਤੀ ਦਾ ਕਰਮ ਜਲ਼ਣਾ !
