ਮੁਸਤਕਬਿਲ, ਨਾ ਬੀਤੇ ਸਾਲ ਤੇ ਰੱਖਨਾ ਵਾਂ ।
ਆਪਣੀਆਂ ਨਜ਼ਰਾਂ ਆਪਣੇ ਹਾਲ ਤੇ ਰੱਖਨਾ ਵਾਂ ।
ਭਾਵੇਂ ਕਿਸੇ ਮੁਸਾਫ਼ਿਰ ਰਸਤਾ ਭੁੱਲਣਾ ਨਈਂ,
ਫਿਰ ਵੀ ਬੂਹੇ ਦੀਵਾ ਬਾਲ ਤੇ ਰੱਖਨਾ ਵਾਂ ।
ਅਜੇ ਵੀ ਤਾਅਨੇ ਦੇਵੇਂ ਮੈਨੂੰ ਦੂਰੀ ਦੇ,
ਤੈਨੂੰ ਆਪਣੇ ਸਾਹ ਦੇ ਨਾਲ ਤੇ ਰੱਖਨਾ ਵਾਂ ।
ਏਸ ਵਰ੍ਹੇ ਵੀ ਛੂਟ ਏ ਜ਼ੁਲਮ ਕਮਾਲੈ ਤੂੰ,
ਇਹਦਾ ਬਦਲਾ ਅਗਲੇ ਸਾਲ ਤੇ ਰੱਖਨਾ ਵਾਂ ।
ਫੇਰ ਵੀ ਗੱਲਾਂ ਕਰਦਾ ਏ ਵੱਖ ਹੋਣ ਦੀਆਂ,
ਤੈਥੋਂ ਤੇਰਾ ਵੱਧ ਖ਼ਿਆਲ ਤੇ ਰੱਖਨਾ ਵਾਂ ।
ਦਿਲ ਪੈਲੀ ਚੋਂ ਭਾਵੇਂ 'ਸੋਮਾ' ਫੁੱਟਣਾ ਨਈਂ,
ਅੱਖ ਦਾ ਬੰਜਰ ਖ਼ਾਲੀ, ਖਾਲ ਤੇ ਰੱਖਨਾ ਵਾਂ ।
