ਰਾਤੀਂ ਤਾਰਿਆਂ ਦੇ ਨਾਲ
ਅਸੀਂ ਗਲਾਂ ਕੀਤੀਆਂ
ਉਹਨਾਂ ਸੁਣੀਆਂ ਸੁਣਾਈਆਂ
ਅਸਾਂ ਜੋ ਜੋ ਬੀਤੀਆਂ
ਰਾਤੀਂ ਕਾਲਖਾਂ ‘ਚ ਰਾਹ
ਬੇਨਿਸ਼ਾਨ ਹੋ ਗਏ
ਵੇਲੇ ਤੈਂਡੜੀ ਉਡੀਕ ਦੇ
ਵੀਰਾਨ ਹੋ ਗਏ
ਤੂੰ ਨਾ ਆਇਓ ਚੰਨਾਂ
ਤਾਰੇ ਮਿਹਰਬਾਨ ਹੋ ਗਏ
ਪਾਈਆਂ ਦੁਖੀਆਂ ਨੇ
ਦੁਖੀਆਂ ਦੇ ਨਾਲ ਪ੍ਰੀਤੀਆਂ
ਰਾਤੀਂ ਤਾਰਿਆ ਦੇ ਨਾਲ
ਅਸਾਂ ਗਲਾਂ ਕੀਤੀਆਂ
ਸਾਡੀ ਗਲ ਸੁਣ ਅੰਬਰਾਂ ਦੀ
ਅੱਖ ਡੁਲ੍ਹ ਗਈ
ਤਾਰਾ ਟੁੱਟਾ ਓਹਦੀ ਅੱਗ ਵਾਲੀ
ਗੰਢ ਖੁੱਲ੍ਹ ਗਈ
ਕਹਿੰਦਾ ਨਿੱਕੀ ਜਿਹੀ ਜਿੰਦ ਤੇਰੀ
ਕਿਵੇਂ ਰੁਲ ਗਈ
ਕਿਵੇਂ ਮਿੱਟੀ ਤੇਰੀ ਮਹੁਰੇ
ਦੀਆਂ ਬੁੱਕਾਂ ਪੀਤੀਆਂ
ਰਾਤੀਂ ਤਾਰਿਆਂ ਦੇ ਨਾਲ
ਅਸਾਂ ਗੱਲਾਂ ਕੀਤੀਆਂ
ਸਾਡੇ ਅੰਗ ਅੰਗ ਤਾਰਿਆਂ
ਨੇ ਲੋਆਂ ਗੁੰਦੀਆਂ
ਹੰਝੂ ਵਾਲਿਆਂ ਨੂੰ ਲੋਆਂ
ਦੀਆਂ ਲੋੜਾਂ ਹੁੰਦੀਆਂ
ਲੈ ਕੇ ਅੱਗ ਅਸੀਂ ਅੱਖੀਆਂ
ਨ ਕਦੇ ਮੁੰਦੀਆਂ
ਹੰਝੂ ਦੇ ਕੇ ਅਸਾਂ ਚਿਣਗਾਂ
ਵਿਹਾਝ ਲੀਤੀਆਂ
ਰਾਤੀਂ ਤਾਰਿਆਂ ਦੇ ਨਾਲ
ਅਸੀਂ ਗਲਾਂ ਕੀਤੀਆਂ
