ਰੋਜ਼ ਸਵੇਰੇ ਤੜਕੇ ਉੱਠਾਂ,
ਸੈਰ ਕਰਨ ਲਈ ਜਾਵਾਂ।
ਅੱਧਾ-ਪੌਣਾ ਘੰਟਾ ਲਾ ਕੇ,
ਮੁੜ ਕੇ ਵਾਪਸ ਆਵਾਂ।
ਆ ਦੰਦਾਂ ਦੀ ਕਰਾਂ ਸਫਾਈ,
ਨਾਲੇ ਮਲ਼-ਮਲ਼ ਨਾਵ੍ਹਾਂ।
ਪਿੰਡਾ ਸਾਫ਼ੇ ਨਾਲ ਪੂੰਝ ਕੇ,
ਸੁਹਣੇ ਕੱਪੜੇ ਪਾਵਾਂ।
ਸੁਹਣੇ ਧੋਤੇ ਕੱਪੜੇ ਪਾ ਕੇ,
ਮਾਂ ਤੇ ਬਾਪ ਧਿਆਵਾਂ।
ਇਸ ਤੋਂ ਪਿੱਛੋਂ ਰੱਬ ਦੇ ਦਰ 'ਤੇ,
ਜਾ ਕੇ ਸੀਸ ਨਿਵਾਵਾਂ।
ਮਾਂ-ਬਾਪ ਤੇ ਰੱਬ ਧਿਆ ਕੇ,
ਅੰਨ-ਜਲ ਮੂੰਹ ਨੂੰ ਲਾਵਾਂ।
ਦੁੱਧ ਦੇ ਨਾਲ ਪਰੌਂਠੀ ਖਾ ਕੇ,
ਰੱਬ ਦਾ ਸ਼ੁਕਰ ਮਨਾਵਾਂ।
ਫੇਰ ਪੜ੍ਹਾਂ ਮੈਂ ਰੋਜ਼-ਮਰ੍ਹਾ ਹੀ,
ਪੇਪਰ ਦੀਆਂ ਘਟਨਾਵਾਂ।
ਚੰਗੀਆਂ-ਮੰਦੀਆਂ ਖਬਰਾਂ ਪੜ੍ਹ ਕੇ,
ਆਪਣਾ ਗਿਆਨ ਵਧਾਵਾਂ।
ਬਸਤੇ 'ਚੋਂ ਫਿਰ ਕੱਢ ਕਿਤਾਬਾਂ,
ਮੱਥੇ ਦੇ ਨਾਲ ਲਾਵਾਂ।
ਅੱਖਰ-ਅੱਖਰ ਕੱਲ੍ਹ ਦਾ ਪੜ੍ਹਿਆ,
ਮੁੜ ਕੇ ਫਿਰ ਦੁਹਰਾਵਾਂ।
ਮਨ ਮੰਦਰ ਵਿੱਚ ਵਿੱਦਿਆ ਦੀ ਮੈਂ,
ਸੁੱਚੀ ਜੋਤ ਜਗਾਵਾਂ।
ਚੱਕ ਕੇ ਮੋਢਿਆਂ ਉੱਤੇ ਬਸਤਾ,
ਉੱਡ ਸਕੂਲੇ ਜਾਵਾਂ।
