ਦੱਬ ਕੇ ਮਿਹਨਤ ਕਰੀਏ ਯਾਰੋ।
ਚਿੱਤ ਲਗਾ ਕੇ ਪੜੀਏ ਯਾਰੋ।
ਵਿੱਦਿਆ ਧਨ ਅਨਮੋਲ ਬੜਾ ਹੈ,
ਪੜ੍ਹ ਕੇ ਮੰਜ਼ਿਲ ਚੜ੍ਹੀਏ ਯਾਰੋ।
ਅਨਪੜ੍ਹ ਦੀ ਕੀ ਜੂਨ ਭਲਾ ਹੈ,
ਮਨ ਚਿੱਤ ਰੌਸ਼ਨ ਕਰੀਏ ਯਾਰੋ।
ਝੂਠ ਬੋਲਣਾ ਪਾਪ ਹੈ ਹੁੰਦਾ,
ਸੱਚ ਦੀ ਪੌੜੀ ਚੜ੍ਹੀਏ ਯਾਰੋ।
ਕਿਤਾਬਾਂ ਅਤੇ ਰਸਾਲੇ ਪੜ੍ਹੀਏ,
ਅਖ਼ਬਾਰਾਂ ਹੱਥੀਂ ਫੜੀਏ ਯਾਰੋ।
ਖੇਡ ਖੇਡੀਏ ਰਲਕੇ ਸਾਰੇ,
ਆਪੋ ਵਿੱਚ ਨਾ ਲੜੀਏ ਯਾਰੋ।
ਇੱਕ ਦੋ ਘੰਟੇ ਵੇਖ ਕੇ ਦਿਨ ਵਿੱਚ,
ਟੀ.ਵੀ. ਨੂੰ ਬੰਦ ਕਰੀਏ ਯਾਰੋ।
ਜੂਆ ਭੈੜਾ, ਦਾਰੂ ਮਾੜੀ,
ਨਸ਼ਿਆਂ ਕੋਲੋਂ ਡਰੀਏ ਯਾਰੋ।
ਲੋੜ ਪਈ ਤਾਂ ਦੇਸ਼ ਕੌਮ ਲਈ,
ਸੀਸ ਤਲੀ 'ਤੇ ਧਰੀਏ ਯਾਰੋ।
ਜੰਗਾਂ ਦੀ ਗੱਲ ਛੱਡ-ਛੁਡਾ ਕੇ,
ਅਮਨਾਂ ਦੀ ਗੱਲ ਕਰੀਏ ਯਾਰੋ।
