ਤਿਤਲੀ-ਤਿਤਲੀ ਉਡਦੀ ਆ
ਉਡਦੀ ਸਾਡੇ ਬਾਗੀਂ ਆ।
ਬਾਗੀਂ ਫੁੱਲਾਂ ਉੱਤੇ ਬਹਿ,
ਬਹਿ ਕੇ ਸਾਡਾ ਚਿੱਤ ਪਰਚਾਅ!
ਤਿਤਲੀ-ਤਿਤਲੀ…………!
ਤੱਕ-ਤੱਕ ਤੈਨੂੰ ਹੱਸਾਂਗੇ।
ਹੱਸ-ਹੱਸ ਸਭ ਨੂੰ ਦੱਸਾਂਗੇ।
ਸਾਡੇ ਬਾਗੀਂ ਤਿਤਲੀ ਆਈ।
ਖੁਸ਼ੀਆਂ ਦਾ ਭੰਡਾਰ ਲਿਆਈ।
ਲਈਏ ਇਹਦੇ ਦਰਸ਼ਨ ਪਾ,
ਤਿਤਲੀ-ਤਿਤਲੀ…………!
ਤੈਨੂੰ ਨਾ ਕੋਈ ਛੇੜੇਗਾ।
ਨਾ ਤੈਨੂੰ ਕੋਈ ਮਾਰੇਗਾ।
ਨਾ ਹੀ ਤੇਰੇ ਪੰਖ ਪਕੜ ਕੇ,
ਸੂਲੀ ਉੱਤੇ ਚਾੜ੍ਹੇਗਾ।
ਵਾਅਦਾ ਤੇਰੇ ਨਾਲ ਰਿਹਾ,
ਤਿਤਲੀ-ਤਿਤਲੀ…………!
ਤੂੰ ਤਾਂ ਬੜੀ ਸਿਆਣੀ ਏਂ।
ਬਾਗਾਂ ਦੀ ਤੂੰ ਰਾਣੀ ਏਂ।
ਤੇਰੇ ਬਾਝੋਂ ਸਾਡਾ ਬਾਗ।
ਨਾ ਛੇੜੇ ਮਹਿਕਾਂ ਦਾ ਰਾਗ।
ਆ ਬਗੀਆ ਦੀ ਸ਼ਾਨ ਵਧਾ,
ਤਿਤਲੀ-ਤਿਤਲੀ…………!
ਚਿੱਟੇ-ਪੀਲੇ ਅਤੇ ਉਨਾਭੀ।
ਝੂਮੀ ਜਾਂਦੇ ਫੁੱਲ ਗੁਲਾਬੀ।
ਦੇਖਣਗੇ ਜਦ ਤਿਤਲੀ ਆਈ।
ਖੁਸ਼ੀਆਂ ਹਾਸੇ ਮਹਿਕ ਲਿਆਈ।
ਸਭ ਨੇ ਕਹਿਣਾ, "ਵਾਹ ਬਈ ਵਾਹ!"
ਤਿਤਲੀ-ਤਿਤਲੀ…………!
