ਵਾਹਗੇ ਪਾਰ ਵਸੇਂਦੇ ਇਕ ਸਜਣ ਦੇ ਨਾਂ
ਮੁੜ ਅਜ ਯਾਦ ਕਿਸੇ ਦੀ ਆਈ,
ਆਈ ਯਾਦ ਕਿਸੇ ਦੀ ।
ਲੂੰ ਲੂੰ ਦੇ ਵਿਚ ਧਾਈ ਯਾਦ ਕਿਸੇ ਦੀ ।
ਆਈ ਯਾਦ ਕਿਸੇ ਦੀ ।
ਯਾਦ ਕਿਸੇ ਦੀ ਰਾਸ ਦਿਲੇ ਦੀ,
ਐਸੇ ਰਾਸੋਂ ਵਟਕ ਹੋਈ ਸੀ ਲਟਕ ਕਿਸੇ ਦੀ,
ਏਸੇ ਲਟਕੋਂ ਮੁੜ ਅਜ ਤਰ ਗਈ,
ਡੁਬੀ ਹੋਈ ਰਾਸ ਕਿਸੇ ਦੀ ।
ਰਾਸ ਕਿਸੇ ਦੀ,
ਆਈ ਯਾਦ ਕਿਸੇ ਦੀ ।
ਵਿਛੜੇ ਸਜਣ ਯਾਦ ਜਾਂ ਆਵਣ ।
ਅੱਖਾਂ ਵਿਚ ਅਥਰੂ ਫੇਰੇ ਲਾਵਣ ।
ਹਰ ਅਥਰੂ ਦੇ ਸ਼ੀਸ਼ ਮਹਿਲ ਵਿਚ,
ਦਿਸਣ ਆਸਾਂ ਡੱਕੀਆਂ ਹੋਈਆਂ ।
ਕੈਦਾਂ ਕਟ ਕਟ ਥੱਕੀਆਂ ਹੋਈਆਂ ।
ਉਦਰੇਵੇਂ ਪਏ ਤਰਲੇ ਲੈਂਦੇ ।
ਕਾਹਲਾਂ ਕਰਦੇ ਸੌੜੇ ਪੈਂਦੇ ।
ਇਨ੍ਹਾਂ ਕਾਹਲਾਂ ਸੌੜਾਂ ਹੱਥੋਂ
ਅੱਖ ਝਮਕਣ ਵਿਚ,
ਸ਼ੀਸ਼ ਮਹਿਲ ਪਏ ਢਹਿੰਦੇ ।
ਸੁਜੀਆਂ ਅੱਖਾਂ ।
ਸਿੱਜੀਆਂ ਪਲਕਾਂ,
ਪਲਕਾਂ ਦੇ ਵਿਚ ਰੱਤ ਦੀਆਂ ਡਲ੍ਹਕਾਂ ।
ਬਲਦੇ ਹਾਵੇ,
ਠੰਢੇ ਹੌਕੇ,
ਇਕ ਮਿਕ ਹੁੰਦੇ ਹਾੜ੍ਹ ਤੇ ਸਾਵਣ ।
ਵਿਛੜੇ ਸਜਣ ਯਾਦ ਜਾਂ ਆਵਣ ।
ਮੁੜ ਅਜ ਯਾਦ ਕਿਸੇ ਦੀ ਆਈ,
ਆਈ ਯਾਦ ਕਿਸੇ ਦੀ ।
ਲੂੰ ਲੂੰ ਦੇ ਵਿਚ ਧਾਈ ਯਾਦ ਕਿਸੇ ਦੀ ।
ਆਈ ਯਾਦ ਕਿਸੇ ਦੀ ।
