ਯਾਰ ਕਹਿੰਦਾ ਸੀ ਜੋ ਗ਼ਰਜ਼ਾਂ ਦਾ ਪੁਜਾਰੀ ਨਿਕਲਿਆ ।
ਮੈਂ ਰਿਹਾ ਸਾਦਾ ਸਮਝਦਾ ਉਹ ਮਦਾਰੀ ਨਿਕਲਿਆ ।
ਕਿਸ ਤਰ੍ਹਾਂ ਜੀਵਨ ਬਿਤਾਵਾਂ ਯਾਰ ਮੇਰੇ ਦੀ ਤਰ੍ਹਾਂ,
ਅੱਜ ਮਿਰਾ ਸਾਇਆ ਵੀ ਦੁਸ਼ਮਨ ਦਾ ਹਵਾਰੀ ਨਿਕਲਿਆ ।
ਮੰਜ਼ਿਲਾਂ ਤੇ ਜਾਣ ਦੇ ਪੁਖ਼ਤਾਂ ਇਰਾਦੇ ਸਨ ਮਿਰੇ,
ਪਰ ਮਿਰਾ ਜੁੱਸਾ ਮੇਰੀ ਹਿੰਮਤ ਤੋਂ ਭਾਰੀ ਨਿਕਲਿਆ ।
ਸੋਚ ਦੇ ਪੱਤੇ ਹਰੇ ਹੋਏ ਖ਼ਿਜ਼ਾ ਰੁੱਤੇ ਜਦੋਂ,
ਝੂਠ ਦੀ ਬਸਤੀ ਚੋਂ ਇਕ ਸੱਚਾ ਲਿਖਾਰੀ ਨਿਕਲਿਆ ।
ਲੁੱਟਿਆ ਏ ਕਾਫ਼ਲੇ ਨੂੰ ਕਾਫ਼ਲੇ ਦੇ ਆਗੂਆਂ,
ਰਹਿਨੁਮਾ ਦੇ ਭੇਸ ਵਿਚ ਹਰ ਇਕ ਸ਼ਿਕਾਰੀ ਨਿਕਲਿਆ ।
ਪਿਆਰ ਦੇ ਬਦਲੇ 'ਚ 'ਅਨਵਰ' ਨਫ਼ਰਤਾਂ ਉਸ ਮੋੜੀਆਂ,
ਬੇ-ਵਿਹਾਰੇ ਦੌਰ ਵਿਚ ਬੰਦਾ ਵਿਹਾਰੀ ਨਿਕਲਿਆ ।
